KOTA KINABALU: Komontirian Kopotundaan Mogigiyon om Kasasanangan Rayat (KPMKR) minamaramit osonong suang do kinapawaladan Bajet 2022 di songkonihab sabab ilo’ nopo nga’ kopiongoi di hontolon do komontirian dilo’ sondiri’.
Montiri dilo’, Datuk Ir. Shahelmey Yahya minoboros, tinimungan porikotan KMPKR miagal do koonduan, tulun nolohing, tina’ toi tama’ sosongulun, tulun suai kohimboguian (OKU) nogi’ tanak-anak kotilombus karamit kopomodulian ouli’ mantad koporintaan Pisompuruan.
Pinointalang disio do kopihunung kopio ilo’ di uhu Paganakan Malaysia, Makmur Bersama.
“Romiton tosonong tokou o Bajet 2022 sabab tinimungan porikotan miagal do tulun nolohing, ibu tunggal, tulu suai kohimboguian (OKU), tanak-anak om koonduan nga’ pointonggoi.
“Kootusan do koporintaan montok papagaras do Bohogian D11 Pulis Diraja Malaysia (PDRM) montok popoindalan ponoriukan seksual kohondot do koonduan om tanak-anak nopo nga’ kohunung kopio.
“Suai ko ilo’, ponguhupan ngaawi’ kumaa ibu tunggal om tulun nolohing nga’ rinuhangan gatang dlo’ tumanud kosudongan di pinatantu’ id sahau Ponguhupan Paganakan Malaysia (BKM),” ka disio.
Naamot dilo’, minoboros i Shahelmey do Bajet 2022 i pinawalad di Montiri Kousinan Malaysia, Tengku Datuk Zafrul Aziz id Parlimen di songkonihab kopokito nogi’ rikoton atalang do koporintaan montok monguhup ononduli’ ikonomi i noumpadanan do tomporuruol Covid-19.
“Nosusuhut do kinoburuon koponondulian pogun mantad tomporuruol Covid-19, pinggisoman montok poposindak kosunion ikonomi nopo nga’ oponsol.
“Iti sabab no do ontok timpu pandemik, ogumu’ tinimungan noinraatan kaampai no sukod wagu om mantad jominan karaja’ montok 600,000 kosiwatan karaja’, ababayan MyStep montok 80,000 tulun tutumanud om susuai ponguhupan pingludaan nogi’ kopoingkawasan ‘skill’ / komilaan, kosiwatan koimbulai montok monguhup kopoiyanan karaja’ om papasarok ikonomi,” ka disio.
