KOTA KINABALU: Koporintaan pogun minamaramit di Bajet Pogun 2022 i pinawalad di Montiri Kousinan, Senator Tengku Datuk Zafrul Tengku Abdul Aziz sabaagi poinpuli om amu’ kopongiduan di nombo-nombo siktyor om isaisai nopo mamaso pogun nokotoguang waya’ tomporuruol Covid-19.
Boyoon Montiri (KM), Datuk Seri Hajiji Haji Noor minoboros, Bajet Paganakan Malaysia, ‘Makmur Sejahtera’ RM332.1 bilion nopo nga’ bobos tagayo sabab toun tiso’ pikikiro kosili toun koponondulianan koinsanai siktor ikonom i noinraatan gagama’ do tomporuruol dilo’.
“Kinoinsawaton poruntukan kuminaa RM5.2 bilion montok kogogonopan, infrastruktur, waig om lotirik nogi’ kopotundaan kapanamangan kolidasan montok Sabah nopo nga’ habar tosonong,” ka disio.
I Boyoon Montiri minoboros do Sabah mongunsikou kopomodulianan po’ompus do koporintaan Pisompuruan kohondot kogugunaan pogun miampai pinapaatag do rM1.5 bilion montok kopotundaan infrastruktur labus kakadayan id Sabah om Sarawak.
I Hajiji minamaramit tosonong nogi’ di jominan projik infrastruktur kigatang RM3.5 bilion, i wookon dilo’ ralan tagayo Pan Borneo maan tilombuso’ do toun tobontol.
Atag kopoiduan sukai om ponguhupan montok mogisusuai siktor id Bajet Pogun i pinawalad di Montiri Kousinan nokopomogonop do ababayan Hontolon Sabah Maju Jaya (SMJ) Koporintaan Pogun Sabah.
“Okito tokou Bajet Pogun sabaagi pomogonop Palan Malaysia Ko-12 om mongunsikou tokou di atag pongusinan montok Sabah do toun tiso’,” ka disio katalib tuminanud kinapawaladan Bajet 2022 Pogun di songkonihab.
I Hajiji minongunsikou nogi’ di subsidi RM209 riong di po’ompus montok surupukaraja’ Padsakaian tawan id Sabah om Sarawak.
Atag Kem Tinimungan Gerakan Am (GOF) id Pagalungan ototopot do koponguhup id kopoingkawasan koumoligan piwolitan pialatan do Malaysia om Indonesia, ka disio.
I Boyoon Montiri nga’ minamaramit tosonong nogi’ di atag pongusinan RM746 riong, sombohogian ginumu’ mantad dilo’ montok 112 projik monginsonong sikul id Sabah.
Nakaampai nogi’ disio i Kumoduo Boyoon Montiri, Datuk Seri Dr. Jeffrey Kitingan; Montiri Koporintaan Nokoiyonon om Pomuwalaian po nogi’ Montiri Kousinan II, Datuk Seri Masidi Manjun; Monunurat Koporintaan Pogun, Datuk Seri Sr Safar Untong om upisor totuot koporintaan.
