KOTA KINABALU: Puru Parlimen Pensiangan, Datuk Arthur Joseph Kurup otumbayaan do suang Bajet 2022 koponuluk di rikoton Paganakan Malaysia miampai manahak koposotolan di hal ngaawi’ kapatanggaayan, kopogiagalan om kounsikohan montok papatantu’ oinsanan koburu’ sabaagi songinan Paganakan Malaysia.
“Otumbayaan oku do oinsanan Paganakan Malaysia i potuu id kakadayan, labus kakadayan toi ko’ poonsokid amu’ momuntuk do naangayan balajaran, ugama’, tinaru toi parti pulitik mamaramit osonong di pinggisoman i poinsuang doid Bajet 2022,” ka disio id kointalangan media di konihab.
Ka disio, Koporintaan buruanan di Luguan Montiri Datuk Seri Ismail Sabri Yaakob i pinapawalad Bajet 2022 ki’uhu ‘Keluarga Malaysia Makmur Sejahtera’ pinoposuul do 3M ilo’ nopo nga’ monginggirot koponondulianan, monuridong kinasangalon om papasarok do koponginwoguan.
“Kopiongoi di angkab Paganakan Malaysia om Palan Malaysia Ko-12, 2022 nopo nga’ kopokitanan sunduan i pinatanom do koporintaan id kopomorintaan pogun i pinopoiliu do kosuulon om kasasanangan rayat sabaagi hal oponsol kaagal do manamong songinan paganakan,” ka disio po nogi’ Kumoduo Montiri Karaja’ Tagayo.
Ka di Arthur, kopotundaan sosio ikonomi pogun kotilombus kosili toguangon tosuul kaampai id Sabah montok popokikip pisuaian kopotundaan ikonomi pogialatan pogun, watas, kakadayan om labus kakadayan mooi do koburuon ikonomi aramit miampai aadas om aadang.
Mintong mantad sunduk kotundunan, ka disio, laang koporintaan pinopointutun Ponguhupan Paganakan Malaysia (Bantuan Keluarga Malaysia – BKM) miampai RM2,000 kumaa suang walai i kitanak tolu tulun toi lobi miampai nindopuan osiriba’ RM2,500 sombulan koponginggaan tonggungan Paganakan Malaysia id labus kakadayan loolobi no id watas poonsokid Sabah i noumpadanan gagama’ tomporuruol Covid-19.
“Koposuulan do koporintaan id kopotundaan infrastruktur doid watas labus kakadayan miagal do watas poonsokid sabah kopogowit do kosimbanon kumaa ikonomi om sosial id kinoiyonon dilo’.
“Soginumu’ RM5.2 bilion pinosodia’ montok pabalanjaan kopotundaan Sabah wookon nopo nga’ pomonsoi talun-alun labus kakadayan om ralan piromutan kampung, pangaba’ waig labus kakadayan om pangaba’ waig sumpili’ nogi’ suai-suai infrastruktur kosili pogirot kumaa kogogonopan montok Paganakan Malaysia id Sabah,” ka disio.
Suai ko ilo’, ka disio, laang koporintaan momoruhang walu’ pos kapanamangan Tinimungan Gerakan Am kaampai id Pagalungan, Sabah nopo nga’ laang di kohunung kopio montok monginggirot bantug pomogunan sabab no do kopotundaan di aparagat id Kalimantan, Indonesia.
“Iti montok papatantu’ koumoligan pomogunan lolobi no koumoligan mogigiyon nokoiyonon toririmo oonuan kopogintongan poinbida’,” ka disio.
Naamot id sunduk kopotundaan ikonomi, ka disio, laang koporintaan montok tumilombus popoindalan projik ngaawi’ tokoro’ om gonsuhatan kigatang RM2.9 bilion i pinotomod kumaa kuntiriktor kelas G1 om G4 id poliliput pogun koponguhup papasarok kawagu kosunion ikonomi pomogunan suai ko’ monokodung ikonoim mongingindapu’ tokoro’ i nokogompit id siktor kapamansaian.
“Otopot nopo Bajet 2022 nopo nga’ iso’ laang i nanu do koporintaan miampai pinopo’iliu do poimpahan ‘aiso’ oiduanan’ id sunduk kopotundaan tinmpu toniba’ pogun,” ka disio.
