KOTA KINABALU: Sabah pinoporuput 447 kes wagu Covid-19 di tadau baino’, nokoinsiriba’ 203 kes nung piadangon di konihab (650).
Montiri Koporintaan Nokoiyonon om Pomuwalaian, Datuk Seri Masidi Manjun minoboros, ginumu’ kes di tadau baino’ nokoinsiriba’, poingkuro po, tumanud koyuon noondo, kinoinsiribaon tagayo diti montok nopo do naamot om misiriba’ mikawas mantad timpu kumaa timpu.
Ka disio, suai ko’ watas Kota Kinabalu, oinsanan watas suai id Sabah nokoposurat tintob Covid-19 wagu id siriba’ 50.
“Kota Kinabalu nokoposurat 84 kes, kinoinsawaton 37 kes nung piiradon di ginumu’ kes i nokosurat di konihab. Kogumuan watas nokoposurat kinoinsiribaon kes wagu, wookon nopo nga’ Kota Belud (-36), Tuaran (-38), Beaufort (-36), Papar (-17), Kinabatangan (-48), Penampang (-10) om Sandakan (-16),” ka di Masidi i po nogi’ Mononomboros Covid-19 Sabah.
Mantad di 447 kes i nokoruput di tadau baino’, ka disio, soginumu’ do 2236 kes (52.8%) nopo nga’ kes i naantakan om pinorojistor id suang timpu 24 jam di nakatalib soira’ noilaan kootusan pinomorisaan.
Solobi nopo nga’ kes ngaawi’ i nokorojistor nakatalib duo tadau toi lobi mantad kinoilaan kootusan, ka disio kawagu.
“Soginumu’ do 78 mantad 84 kes i nokosurat id Kota Kinabalu nopo nga’ kes ngaawi’ i alaid nokorojistor 2 tadau toi lobi,” ka disio.
Minoboros isio do soginumu’ 98% mantad koinsanai kes i nokoruput di tadau baino’ nopo nga’ susumakit id kategori iso’ (51 kes) om duo (383).
Susumakit id kategori tolu, apat om limo kakal osiriba’, miampai 2 tulun id kategori tolu, 3 tulun id kategori apat om kategori limo, 2 tulun. Soginumu’ do 6 po kes kakal id ponoriukan potilombus do Koupisan Kolidasan Pogun Sabah (JKNS).
Ginumu’ kes tumanud watas:
Kota Kinabalu 84 (47)
Kota Belud 41 (77)
Ranau 34 (48)
Kota Marudu 33 (46)
Tuaran 30 (68)
Keningau 19 (17)
Beaufort 19 (55)
Tambunan 18 (10)
Papar 18 (35)
Beluran 17 (5)
Lahad Datu 17 (12)
Kudat 16 (7)
Penampang 15 (25)
Tenom 15 (17)
Tawau 15 (31)
Putatan 14 (17)
Pitas 9 ( 20)
Sandakan 7 (23)
Kuala Penyu 6 (2)
Telupid 6 (10)
Kinabatangan 6 (54)
Kunak 2 (6)
Nabawan 2 (4)
Sipitang 2 (6)
Tongod 1 (5)
Kalabakan 1 (0)
Semporna 0 (3)
(Numbur id bingkurung nopo nga’ ginumu’ kes di konihab– 30/10)
Kluster Wagu
Aiso’
