KUALA LUMPUR: Parti Solidariti Tanah Airku (STAR) natagakan songulun kobilangan ouli’ mantad kinoiduan di Monunurat Tagayo dilo’ Datuk Guandee Kohoi, ka di Presiden parti dilo’ Datuk Seri Dr. Jeffrey Kitingan.
I tiagak Guandee, 67, noiduan ginawo id Walai Pongubatan Kuala Lumpur di jam ko 4.45 sodopon konihab. Pinosuang isio id walai pongubatan dilo’ di jam ko 5 minsusuab di songulun mongunguhup mantad orualan kangkab.
I tiagak id Kuala Lumpur montok tuminindapou mitingan Perikatan Nasional (PN) di sodopon tadau Minggu’ nga’ amu’ nokotingan soira’ noilaan do positif Covid-19.
Ka id Dr. Jeffrey, tumongob kopio isio do habar dilo’ om otumbayaan do parti dilo’ natagakan kobilangan om puru dau di kigatang kopio.
“Isio nopo nga’ tambalut ku di otiu’ kopio om i koupusan ku kopio. Miampai isio doho’ minaya’ do kinosusaon om kinasanangon, sundung do maso ku aiso’ nunu-nunu, amu’ yau insan ponongkiad doho’. Ilo’ nopo nga’ osusa’ kopio do mongolon dau,” ka disio.
Minoboros i Dr. Jeffrey, tohuri nopo dau nokopiboros miampai di tiagak nga’ di jam ko 10 kosuabon konihab soira’ di tiagak minomoromut dau mantad walai pongubatan.
“Pinopoilo yau do ososonong yau om amu’ nuru’ do tumongob. Minanahak yau jominan kumaa doho’ do kalabus yau id timpu 3, 4 tadau. Ototopot dilo’ do koruol ginawo ku,” ka disio.
Tumanud di Monunurat Tolisok di Dr. Jeffrey, i Rizal Johari, paganakan di Kohoi suai ko’ i sawo dau, i nogi’ positif Covid-19, nokoungkayut no kuminaa id Kuala Lumpur.
