I nogompitan id kinoiyonon kinaantakan, ralan okikip om kitiir, notutukan walai aiso’ poingiyon om kabun punti.
KOTA KINABALU: Songulun doribal (papamanau) e-hailing rinampuk di duo susumakai kusai id Lorong Burung Keleto, Kampung Likas, do hiti id tadau Kolimo.
I nogompitan songulun kusai kiumur 25 toun, natampasi id kinaantakan kinopomorompukan kisinjata’ i naantakan kikiro limo minit.
Poingkuro po, i nogompitan norugi’ do RM700 soira’ di pipiro barang dau miagal telipaun piowit-owit, dokumen sondiri’ om tusin tunui rinampuk di duo kusai notondosan dilo’.
I Luguan Pulis Watas Kota Kinabalu, ACP Mohd Zaidi Abdullah pinopoimagon kinaantakan kinapagahawan diti soira’ rinomut.
Tumanud disio, i nogompitan di rinampuk minomonsoi ruputan ontok sodop kinaantakan.
Tumanud kointalangan di nogompitan, minaganu yau goduduo susumakai dilo’ id Longkod Konvensyen Sompomogunan Sabah (SICC) kikiro jam ko 10.55 totuong.
Goduduo notondosan minanahak alamat dilo’ om soira’ nokorikot id kinoiyonon di komoyon, songulun mantad di notondosan pinopoilo di nogompitan montok maganu tusin pogulu songulun notondosan id suang korita’ pinapalabus sinjata’ atarom kuminaa id liou di nogompitan om minokianu di nogompitan pinapalabus babarang kigatang.
I nogompitan minumbal suminahap di notondosan gisom noruhak o garung dau. I nogompitan do talib dilo’ pinapatahak di babarang dau sabab orosian do koumoligan tinan dau sondiri.
I notondosan minogidu’ kuminaa kabun punti dodoros. Ka di Mohd Zaidi, tumanud kointalangan di nogompitan, goduduo notondosan kiumur kikiro 20an, kotumbayaan do Bajau Suluk tumanud di boros suai ko’ goduduo nga’ agahui. Songulun di notondosan opurak kokuukulito’ naamot di songulun oitom-itom.
Pinonoriukan id kinoiyonon kinaantakan nokoilo do aiso’ sasi’ osimbayan om CCTV id kinoiyonon dodoros montok ponguhup ponoriukan.
Koiyonon kinaantakan nga’ otuong, okikip ralan om kitiir, notutukan do walai aiso’ poingiyon om kabun punti.
Sasabab no do telipaun piowit-owit d nogompitan naahou, kointalangan moomoguno i minongudar do surupukaraja’ di pinoporuput maya’ aplikasi ‘maxim’ amu’ aanu mogintong.
Kointalangan karait numbur telepon di nogompitan pinatahak kumaa bohogian D8, Longkod Upis Pulis Kontinjen Sabah montok ponguhupan teknikal om ‘fotofit’ wonsoiyon miampai ponguhupan D6.
