KOTA KINABALU: Sabah nokoposurat do 504 kes wagu Covid-19 di tadau baino’, nokoinsiriba’ 135 kes nung piiradon di konihab (639).
Montiri Koporintaan Nokoiyonon om Pomuwalaian, Datuk Seri Masidi Manjun minoboros, tintob nopo diti nga’ i boboros tosiriba’ i nokosurat pointonod di ko 22tw Koturu’ 2021.
Ka disio, soginumu’ do 15 watas nokoposurat kinoinsiribaon kes, 8 watas nokoposurat kinoinsawaton om 4 watas suai nokoponimporon di sinuratan miagal di konihab.
Ka disio kawagu, iso’ no watas i nokoposurat do kinoinsawaton 2 angka ilo’ nopo nga Tongod miampai nokoinggumu’ 10 kes.
“Watas ngaawi nopo suai i nokoposurat kinoinsiribaon kes 2 angka nga’ Kota Belud (-30 kes), Ranau (-28), Kota Kinabalu (-20), Kudat (-17), Putatan (-14), Sipitang (-13) om Keningau (-10).
“Aiso’ watas i nokoposurat kes 3 angka om kes bobos takawas di tadau baino’ nopo i nokosurat nga’ id Kota Kinabalu miampai ginumu’ 60 kes.
Watas ngaawi’ nopo di suai nokoposurat kes wagu id siriba’ 50 kes,” ka di Masidi i po nogi’ Mononomboros Covid-19 Sabah.
Mantad di 504 kes i nokosurat di tadau baino’, ka disio, 198 (39.29%) no kes i mantad pinomorisaan kitanda’ toi kes ngaawi’ i naantakan miampai sporadik, ilo’ nopo nga’ isai nokopogkoroliu om kinoiyonon kinorolihan osusa’ do mongilo.
“I atantu’ ilo’ nopo nga’ iso’ tanda’ do virus Covid-19 haro no doid mogigiyon miampai pointongkop om kosiwatan do orolihan mingkakawas,” ka disio.
“Soginumu’ do 291 kes (57.7%) i nokorikod di tadau baino’ nopo nga’ kes i naantakan po’ompus 24 jam di nakatalib. I nopo lobi nga’ kes laid I alaid nokorojistor duo tadau toi lobi mantad kinoilaan kinootusan pinomorisaan. Poingkuro po, 1 no kes i pinorojistor katalib limo tadau,” ka disio pinopointalang.
Ka disio, mantad tintob koinsanai kes di tadau baino’, 92.06% nopo nga’ id kategori iso’ om duo, naamot 6 kes id kategori tolu, 3 kes id kategori apat om 2 kes id kategori limo. Soginumu’ do 29 po kes kakal id pogintongan do bohogian Koupisan Kolidasan Pogun Sabah (JKNS).
“Sundung koyuon koinsiribaon kes tadau-adau kopounsub nga’ amu’ tokou po nakalantoi pisangadan gumaga’ do tomporuruol Covid-19 diti.
Miagal di pinikikiraan pogulu diti, yati id koyuon do ‘yo-yo’, sororuruhai minsiriba’ om minsawat. Koulalaho’ tokou sondiri’ i kapatantu’ poinguro koyuon do dumontol aanu mongilo.
“Kotonudan kumaa koinsanai kooturan kopoindalanan pinatantu’ (SOP) do poinponu’ om po’omus nopo nga’ tingolig oponsol mongilag kopogkorolihan virus diti.
“Maganu vaksin di ogonop okon nopo ko’ kopongingkawas do imuniti tinan nga nogi’ kaanu monginsiriba’ risiko korolihan om kapatantu’ dati’ koilag mantad waya’ di araat do virus Covid-19 nung orolihan. Vaksin kapanampasi dati’ om paganakan tokou mantad kapataion gagama’ toruol norolihan virus Covid-19,” ka di Masidi.
Ginumu’ kes tumanud watas:
Kota Kinabalu 60 (80)
Penampang 44 (48)
Tuaran 41 (33)
Beaufort 31 (31)
Papar 30 (25)
Kota Marudu 29 (29)
Kota Belud 29 (59)
Keningau 28 (38)
Ranau 24 (52)
Tenom 23 (21)
Lahad Datu 19 (28)
Pitas 19 (19)
Kudat 15 (32)
Tawau 14 (13)
Tambunan 13 (8)
Beluran 13 (17)
Kinabatangan 11 (14)
Kuala Penyu 10 (10)
Sandakan 10 (13)
Tongod 10 (0)
Putatan 8 (22)
Kunak 6 (5)
Semporna 4 (5)
Nabawan 4 (12)
Kalabakan 4 (1)
Telupid 3 (9)
Sipitang 2 (15)
(Numbur id bingkurung nopo nga’ tintob kes di konihab – 16/10)
Aiso’ kluster wagu
