Kohopod; 720 kes wagu Covid-19 di tadau baino’
KOTA KINABALU: Sabah kosudong mundaliu kumaa Fasa 3 Pelan Ponondulian Pogun (PPN) poinggirotkuasa’ ko 18tw Kohopod diti.
Montiri Koporintaan Nokoiyonon om Pomuwalaian, Datuk Seri Masidi Manjun pinapahabar diti id sinuratan doid Twitter disio di tadau baino’.
Naamot dilo’, Sabah nokoposurat 720 kes wagu Covid-19 di tadau baino’, nokoinsawat 29 kes nung piadangon di konihab (691).
“Miagal di pinikikiraan, kes tadau-adau kawaya’ do trend ‘yo-yo’ id timpu toruhai diti. Soira’ nokoinsiriba’ 60 kes di konihab, di tadau baino’ kes koinsanai Sabah nokoinsawat 29 kes,” ka di Masidi po nogi’ Mononomboros Covid-19 Sabah.
Masidi Manjun
Ka disio, sundung kes kumulatif pogun Sabah nokoinsawat di tadau baino’, nga’ ginumu’ do watas i nokoposurat kinoinsiribaon kes nopo nga’ lobi kogumu’ ko’ mantad di watas i nokoposurat kinoinsawaton kes.
“Ginumu’ watas i nokoposurat kinoinsawaton nopo nga’ 11 watas om i nokoporikod kinoinsiribaon soginumu’ 16 watas.
“Koinsanai kakadayan tagayo nga’ nokoposurat kinoinsiribaon suai ko’ Putatan om Kudat, i sopipoopori nokoposurat kinoinsawaton soginumu’ 29 kes om 28 kes nung piadangon di konihab.
“Sundung ingkaa, 4 no watas i nokoposurat do kinoinsiribaon id gulampot 2 numbur ilo’ nopo nga’ Ranau (-41 kes), Pitas (-41), Kota Kinabalu (-11) om Kunak (-10).
“Watas i nokoposurat kinoinsawaton kes di ogugumu’ nopo nga’ Kinabatangan (+40), Keningau (+23), Tenom (+13) om Beaufort (+10).
“Sundung do osuususa’ mongiikiro koyuon kosimbanon kes montok watas ngaawi’ id Sabah id timpu toruhai, nga’, koyuon kumulatif kinopogkorolihan id suang timpu 14 tadau kopokito koyuon di rumantai,” ka di Masidi.
Di tadau baino’, kes wagu minintonod do pinomorisaan kitanda’ nopo nga’ soginumu’ do 253 kes (35.14%) mantad ginumu’ koinsanai.
“Iti iso’ ponokotanda’ do gontob kotonudan kooturan kopoindalanan pinatantu’ id nayatan mogigiyon amu’ po songkuro koposontob,” ka disio.
Mantad di 720 kes i pinorojistor di tadau baino’, ka disio, 470 (65.28%) nopo nga’ kes ngaawi’ i pinorojistor id suang timpu 24 jam di nakatalib.
Mantad di 720 kes di tadau baino’, 96.25% nopo nga’ id kategori iso’ om duo, naamot 1 no kes kategori tolu, 4 kes kategori apat om 2 kes kategori limo. 20 kes kakal id kopogintongan.
Ginumu’ kes tumanud watas:
Kota Kinabalu 68 (79)
Kudat 62 (34)
Keningau 58 (35)
Kinabatangan 57 (17)
Tenom 50 (37)
Kota Belud 50 (51)
Kota Marudu 44(53)
Tuaran 42 (39)
Putatan 34 (5)
Lahad Datu 31 (33)
Ranau 31 (72)
Tawau 24 (25)
Papar 22 (24)
Beluran 18 (20)
Sandakan 18 (19)
Penampang 17 (25)
Telupid 16 (12)
Beaufort 15 (5)
Tambunan 14 (12)
Sipitang 11 (4)
Pitas 11 (52)
Nabawan 10 (3)
Tongod 8 (11)
Semporna 4 (7)
Kunak 3 (13)
Kuala Penyu 1 (2)
Kalabakan 1 (2)
(Numbur id bingkurung nopo nga’ ginumu’ kes di konihab– 14/10)
Aiso’ kluster wagu
