Koyuon korita dilo i nakaampai id kinoligaganan.
KOTA KINABALU: Duo tulun kaampai upisor pulis nokorundun id iso kinoligaganan id Jalan Lintas, Metrotown, Kota Kinabalu, kikiro jam ko 5.30 minsusuab baino.
Padsakaian sinakaian diolo’ komoyon do nokosunsud sondiri om talib dilo nakatahub kayu id tanganga’ ralan dilo pogulu goduduo diolo nakataam doid suang parit pomiduo ralan.
Ponowoli Luguan Pulis Watas Kota Kinabalu, Supt. George Abd. Rakman pinopoimagon kinaantakan kinoligaganan diti.
Ka di George, ponoriukan tosopung nokoilo, padsakaian pinapanau di nogompitan tondu, Dylevia Dewalter, 38, om miampai susumakai i po nogi tambalut dau, Azrini @ Azrin Abu Bakar, 42, kipangkat Asisten Supt. om poingkaraja id Longkod Upis Pulis Watas (IPD) Kunak.
Ka disio, padsakaian dilo kotumbayaan id pamanahan mantad hapak Citymall kumaa Jalan Tuaran Bypass.
Ka disio kawagu, ontok kinaantakan, koyuon do ralan aiso padsakaian suai om ponoriukan potilombus kakal papanahon.
Goduduo nogompitan nowit kuminaa Bohogian Kecemasan Hospital Queen Elizabeth 1 (HQE 1) montok kinopongusapan pogulu pinoimagon nokoidu pogun di maso usapon.
Kes soriukon tumanud Seksyen 41(1) Akta Padsakaian Ralan 1987.
