KOTA KINABALU: Koporintaan Sabah minamaramit osonong palan songulun mangangapu’ mantad Taiwan do monuridong songinan resort eko-ponombuluyan kitopong 5 bintang id Pulau Mengalum, i pikikiro kos koinsanai lobi RM1 bilion.
“Ponombuluyan oponsol kopio montok Sabah om sabab no dilo’ siktor diti nointutunan sabaagi iso’ mantad di tolu posuulon id pelan kopotundaan Hala Tuju Sabah Maju Jaya (SMJ),” ka di Boyoon Montiri, Datuk Seri Hajiji Haji Noor.
Id pinirubaan miampai do Sinyi Realty Group id Menara Kinabalu doros hiti di konihab, pinopolombus i Hajiji kouniskohan sabab komponi hartanah bobos agayo Taiwan minomili’ do Sabah montok kopoopuan diolo’.
“Sabah nopo nga’ iso’ mantad pogun di olumis kopio id Malaysia om ogumu’ i maan dahai pouyuho’ mantad sunduk kopoopuan doid siktor ponombuluyan,” ka disio.
Hajiji (kaapat, gibang) miampai di Chou Chun Chi (kolimo, wanan) om tinonudan disio katalib kinotombuluyan tapantang dilo’.
Kopiongoi do SMJ, minanahak i Hajiji jominan kumaa Tinimungan Sinyi do koporintaan pogun manahak ponguupan di gunoon montok papasanang kopoopuan diolo’ id pogun diti.
Nokopogulu i Luguan Tinimungan Sinyi, Chou Chun Chi minonongkounsikou kumaa di Boyoon Montiri om Koporintaan Pogun mantad sokodung di pinggisoman dilo’ om minoboros do kopotundaan id Pulau Mengalum kopongimbayat pidagangan ponombuluyan di opuawang.
“Koposodia’ ilo’ do kikiro 2,400 kosiwatan pakarajaan montok mogigiyon nokoiyonon om kalansanan do kopogowit 97,000 tutumombului kumaa Sabah tikid toun,” ka disio.
Minananud di Chou id kinotombuluyan tapantang kuminaa di Hajiji dilo’ i Timbang Ponorikohon Tinimungan Sinyi, Chou Wang Mei Wen; Monijor Tagayo, Chow Kok Yein; Monijor Totuo, Tann Chung Yong om i Monijor Projik, Chou Chun Hao.
Soira’ nakapaganu lobi mantad pitanga’ pulou dilo’ id gatang RM266 riong id toun 2019, Tinimungan Sinyi kipalan montok mononduli’ koiyonon pulou di nalagasan miampai kopogoutonan kawagu om nogi’ mononduli’ karang ngaawi’ id pososorili’ dilo’ i naraag gama-gama’ pomogunaan bom sada’.
Hajiji ruminamit tanda’mato mantad di Chou Chun Chi (koduo, wanan) id kinotombuluyan tapantang dilo’.
Pulau Mengalum pogulu diti nokoumbal nosili longkod kuarantin tayam gisom di toun 1997.
Pogulu kinopogkorolihan tomporuruol Covid-19, pulou dilo’, i poinsumpak lobi sanjaam pamanahan momoguno bot mantad longkod pogun, nointutunan kopio id nayatan tutumombului China.
Nokotindapou nogi’ i Monguhup Montiri Ponombuluyan, Koubasanan om Sandad Posorili’, Datuk Joniston Bangkuai po nogi’ Ponorikohon Kotinanan Ponombuluyan Sabah.
