Tinimungan bomba minonguhup minagkakat tinan di nokito.-Gambar BOMBA
KOTA KINABALU: Tinan songulun kusai nokito poinhabu id tisan rahat W Bay, Lahad Datu di totuong konihab.
I nogompitan, Atan Henry kiumur 20an nokito mabu-habu kikiro jam ko 11.28 totuong.
Tumanud Utusan Malaysia, Monguhup Potunud Bohogian Operasi Koupisan Bomba om Monumpasi Malaysia (JBPM) Sabah, Misran Bisara minoboros, bohogian disio nakaramit pamalahawan agagou mantad Balai Pulis Lahad Datu, montok monguhup popotindal tinan i mabu-habu dilo’.
“Puru mantad Balai Bomba om Monumpasi (BBP) Lahad Datu pinaatod kuminaa kinoiyonon kinaantakan minonguhup magkakat tinan di nogompitan dilo’ om talib dino pinatahak kumaa pulis montok laang potilombus,” ka disio id iso’ kointalangan di tadau baino’.
Id kaantakan di sopisuai, duo kusai nokotoguang do timpu di kotumporosi soira’ bot pam sinakayan notutudan om notorob kikiro 200 meter doros Tanjung Lipat, doros hiti di jam ko 10.16 kosuabon di baino’.
Poingkuro po, goduduo kusai kiumur 14 toun om 40an i po nogi’ monginginsada’ mantad Pulou Gaya dilo’ nakaanu luminoyog kuminaa id tisan rahat dodoros.
Goduduo kusai songkosuayan dilo’ talib dino nuhupan do tinimungan bomba tuminindal.
Ka id Misran, aiso’ karaja’ kinopomisokan di winonsoi om karaja’ manampasi nopupusan di jam ko 10.38 kosuabon.
