KOTA KINABALU: Katatapan Koporintaan Pogun kokomoi kapasagaan dumarapas pogun montok Sabah maan pahabaro’ do tadau Kotolu katalib Mitingan Kabinet.
Momoboros Covid-19 Sabah, Datuk Seri Masidi Manjun minoboros, Komitikuasa’ Koponguludan Covid-19 Pogun Sabah manahak ponimbangan kootusan Koporintaan Pisompuruan diti om popotoguang atag nogi’ kopongokunan kumaa Nuludan Montiri i mitimbungak do tadau Kotolu diti montok koponimbangan.
“Maganu tokou do kopogintongan di pihotusan mogigiyon nosukod id Sabah i nakaanu vaksin nogonop amu’ po nokorikot do 90% (kikiro nogi’ do 65%), kosudongan i pinatantu’ do Koporintaan Pisompuruan montok papasaga’ dumarapas pogun.
“Sabah kakal id kapanamangan pamanahan tumanud Zon (sistem Zon), om kapanamangan dumarapas wats id labus watas Zon kakal poinggirotkuasa’,” ka di Montiri Koporintaan Nokoiyonon om Pomuwalaian dilo’ di baino’.
I Luguan Montiri, Datuk Seri Ismail Sabri Yaakob, id kinapahabaran pinotomod disio di tiinu’ minoboros koporintaan nakaakun montok papasaga’ dumarapas pogun id pomogunon diti mimpuun suab (11tw Kohopod).
