KOTA KINABALU: Sabah nokoposurat 767 kes wagu Covid-19 di tadau baino’, nokoinsiriba’ 17 kes nung piadangon di konihab (784).
Montiri Koporintaan Nokoiyonon om Pomuwalaian, Datuk Seri Masidi Manjun minoboros, koyuon minsiriba’ ginumu’ kes pogun Sabah di tadau baino’ kopiongoi id di ginumu’ watas i nokoposurat kinoinsiribaon ilo’ nopo nga’ 15 watas, naamot 11 watas suai nokoposurat kinoinsawaton tokooro’ om 1 watas ilo’ nopo nga’ Kinabatangan nokopotimporon sinuratan konihab.
“Ranau nokoposurat kinoinsiribaon bobos togumu’ di tadau baino’ miampai 21 kes, om ingkaa nogi’ o watas ngaawi’ suai ilo’ nopo nga’ Beluran (-16), Tenom (-14), Pitas (-12) om Kunak (-11).
“Watas i nokoposurat kinoinsawaton kinoinsawaton ogumu’ di tadau baino’ nopo nga’ pinoguluanan do Kota Kinabalu i nokoposurat kinoinsawaton soginumu’ 33 kes, Kudat (+19), Sipitang (+12 ) om Papar (+11),” ka id Masidi po nogi’ Mononomboros Covid-19 Sabah.
Tumanud disio, sistem koponguludan kopointalangan montok rojistor alaid kes kinorolihan tadau-adau nga’ id koyuon di osonong sundung ginumu’ kes nakalaid montok kes nokorojistor 4-5 tadau di tadau baino’ nokoinsawat tokuuri’ nung piadangon di konihab.
Poingkuro po, ka disio, koyuon pinomorisaan romut osomok sabaagi momoruhang togumu’ kes tadau-adau id pogun Sabah kakal potimporon ilo’ nopo nga’ 54.63% mantad tintob kes tadau-adau di baino’.
“Suai ko ilo’, miampai pihotusan 35.07% mantad tintob kes di tadau baino’ mantad di pinomorisaan kitanda’ nokopokito songkuro koyuon kopogkorolihan id Sabah okon nodii ko’ tumanud kinoiyonon di atantu’, nga’ nokotongkop no doid mogigiyon.
“Tumanud pinonorisidan diti, karalano’ “tumanud poinponu’ di kukumaraja’ nuludan sogulu om nogi’ kopogirotan kuasa’” aiso’ nodii waya’ sabab aiso’ isai i kaanu mongiikiro isai i nosili mogogowit toi isai i norolihan.
“Kiguno tokou mamaramit katapatan do “we have to live with the virus (kiguno tokou masi miampai do virus diti)” om tonudon di bobos osonong i pinounsub nopo nga’ kotonudan do SOP sondiri’, suai ko’ mantad sokodung di pinggisoman vaksinasi i mamaso aparagat popoindalan,” ka disio.
Tumanud tintob kinoponompipian kes ngaawi’ korolihan Covid-19 di tadau baino’, ka disio, 91.52% mantad kes kinorolihan di baino’ id kategori iso’ om duo nopo, naamot 5 no kes kategori tolu, 6 kes kategori apat om 3 kes kategori limo.
Ginumu’ kes tumanud watas:
Kota Kinabalu 112 (79)
Ranau 56 (77)
Keningau 55 (60)
Lahad Datu 53 (59)
Kota Belud 45 (38)
Penampang 40 (33)
Sandakan 38 (46)
Tawau 36 (44)
Tuaran 34 (43)
Papar 33 (22)
Kudat 33 (14)
Kota Marudu 32 (39)
Tenom 32 (46)
Nabawan 25 (17)
Putatan 23 (19)
Sipitang 22 (10)
Kinabatangan 15 (15)
Pitas 15 (27)
Semporna 12 (10)
Telupid 11 (15)
Beluran 9 (25)
Beaufort 8 (13)
Kuala Penyu 7 (3)
Kalabakan 7 (0)
Tambunan 5 (7)
Tongod 5 (8)
Kunak 4 (15)
(Numbur id bingkurung nopo nga’ ginumu’ kes di konihab – 02/10)
Aiso’ kluster wagu
