Miniboboros …. I Hajiji (koduo, gibang) pinapaharo pinibabarasan miampai di Wan Junaidi (koduo, wanan) om i Dr. Maximus (wanan) id Sri Gaya, Kota Kinabalu di tadau baino’.
KOTA KINABALU: Boyoon Montiri, Datuk Seri Hajijji Haji Noor minamaramit kinotombuluyan tapantang mantad di montiri Koupisan Luguan Montiri (JPM) (Parlimen Undang-Undang) Datuk Seri Wan Junaidi Tuanku Jaafar om i Montiri id JPM (Hal Sabah om Sarawak), Datuk Seri Maximus Ongkili id kinoiyonon pinotomod disio id Sri Gaya, di tadau baino’.
Minoboros i Hajiji, mogisusuai hal kopogompit koundangan nogi’ kooturan di pinogibabarasan om sinorisid id pinirubaan dilo’.
“Iti nopo nga’ kituduan montok papatantu’ nunu-nunu undang-undang om kooturan amu’ misansala’ di koundangan potilombus dino kapamajamin om kopomogompi’ kopotutan rayat kosuul no id Sabah.
“Bohogian Koporintaan Pogun toririmo papatantu’ tikid kooturan toi katatapan i simbanan nopo nga’ mimpau di kasasanangan rayat lolobi no kopogompit do ikonomi pogun om rayat.
“Otumbayaan oku id siriba’ kopomuruanan wagu Luguan Montiri ,Datuk Seri Ismail Sabri Yaakob, ababayan montok popoguli’ tongo’ kopotutan rayat Sabah om Sarawak okon i ko’ boros-boros tomod sabalik dino nosili wookon posuulon do koporintaan i maan tumboyoo’,” ka disio.
Nokotindapou nogi’ i Monunurat Koporintaan Pogun (KSN), Datuk Seri Sr. Haji Safar Untong om i Luyar Pogun, Datuk Nor Asiah Mohd. Yusof.
