MOGIGIYON asansagan tumorob do waig liyud montok lumabus walai.
MENUMBOK: Sokukuri’ do tolu koiyonon kaampai duo kampung id watas diti i naantakan do liyud monigowo nokopogowit do ogumu’ walai mogigiyon nolipantaian do waig om nokoponginggorit diolo’ do lumabus walai.
Nosubuanan po ilo’, do kinaantakan diti nopo nga’ liyud di kumoinduo id suang timpu sominggu’.
Monunurat UMNO Bohogian Beaufort, Abdul Rahman Taib minoboros, kampung di nogompitan nopo nga’ Kg. Kinanap, Kg. Darat om padang golf om ogumu’ walai i notorob do waig.
DUO tulun mogigiyon minamanau doid waig liyud di aralom do lumabus.
Ka disio, kampung ngaawi’ dilo’ nokotoguang do liyud di minggu’ nakatalib om di tadau baino’ insan po ilo’ do noliudan.
Tumanud disio, bohogian disio nokopomoromut nodi Injinior Watas Koupisan Karaja’ Tagayo (JKR) Kuala Penyu kokomoi kaantakan liyud dilo’ mooi do laang tosikap aanu do maganu.
“Pinokianu tokou yolo’ do momorisa’ om miontong-ontong do koyuon di pipiro poluluyungan i amu’ katampung waig nokopogowit kinalabaion id koiyonon walai mogigiyon,” ka di Rahman.
Ka disio kawagu, bohogian kikuasa’ kiguno maganu laang om mogihum ralan panalasaian sabab adalaan kasaru’ aantakan liyud id watas diti lolobi no ontok timpu gumompus.
“Tumongob om osianan tokou kokito koyuon mogigiyon soira’ walai diolo’ notorob do waiag om asansagan sumunsung do waig liyud gisom id liou do lumabus walai,” ka disio.
Naamot dilo’, songulun mogigiyon i Mohd. Ariffin Said minoboros, mogigiyon doid Menumbok miagal-agal do amu’ onuan kopomodulianan tikid timpu kotoguang kadaaton.
“Mogigiiyon kawawaya’ nogi’ do kobolingkahangan pangaba’ waig oborisi’ i adalaan kolobou di minggu’ diti om diti baino’ nokotoguang do liyud, mimang do tumongob mogiotung-otung,” ka dau.
