Hajiji pinapatahak boboroson pamantangan di maso istiadat kapamaga’an darjah-darjah ‘kebesaran’ om bintang-bintang nogi’ pingat-pingat Pogun Sabah kopihondot kinouliton toun poinbida’ ko-68 di Molohingon Pogun (TYT) Tun Datuk Seri Panglima (Dr.) Haji Juhar Mahiruddin id Istana Seri Kinabalu di tadau baino’.
KOTA KINABALU: Mogisusuai pinggisoman om karalano’ i ginuno, kaampai no kinapanahakan vaksinasi osonong id kapanamangan kotongkopan tomporuruol Covid-19 id Sabah, ka di Boyoon Montiri Datuk Seri Hajiji Haji Noor.
“Kopogkorolihan tomporuruol Covid-19 id Sabah nokopokito koyuon di minsiriba’. Iti sabab no di mogisusuai pinggisoman om karalano’ i ginuno ilo’ nopo nga’ kapanahakan vaksinasi kumaa koinsanai rayat id pogun Sabah.
“Koyuon diti atalang kopokito diolo’ i nogonop dos ponungkitan vaksin nopo nga’ lobi poumolig om osiriba’ risiko kaanu tomporuruol Covid-19 di adalaan kopio.
“Koyuon di osonong diti potilombus okito nung kosigampot o Sabah do gontob vaksinasi 80 pihatus imuniti kelompok,” ka disio ontok minanahak boboroson kapamantangan di maso istiadat kapamaga’an darjha-darjah ‘kebesaran’ om bintang-bintang nogi’ pingat-pingat Pogun Sabah kopihondot kinouliton toun poinbida’ ko-68 di Molohingon Pogun (TYT) Pogun Tun Datuk Seri Panglima (Dr.) Haji Juhar Mahiruddin id Istana Seri Kinabalu, di baino’.
I Boyoon Montiri minoboros, gisom di ko 29tw Kosiam 2021, ginumu’ mogigiyon nosukod i nogonop ponungkitan vaksin nopo nga’ soginumu’ do 64.3 pihatus, naamot ginumu’ mogigiyon nosukod i sokukuri’ nakaramit iso’ dos nopo nga’ 73.9 pihatus.
“Kinoburuon tosonong diti nokopogowit do lobi kogumu’ siktor ikonomi nukaban id Sabah minimpuun di ko 1tw Kohopod diti, miampai papatantu’ koinsanai kukumaraja’ om tongo’ moomoguno nogonop ponungkitan vaksin nogi’ kistatus risiko osiriba’,” ka di Hajiji.
Minoboros isio, sabaagi koporintaan pogun di opoduli’, haro prinsip kitinonggungan om ‘komited’, iso’ koyuon ‘pelan induk’ i kikoyuon kaanu monokitopong id kopotundaan pogun Sabah, miampai momoguno ginaras poinpoopori om ginaras sunduan mongupus pogun Sabah sabaagi gamut dilo’, nga’ pininggisoman nogi’.
“Mantad diti do nowonsoi o Hala Tuju Sabah Maju Jaya, ilo’ nopo nga’ Pelan Kopotundaan SMJ 1.0:2021-2025, i pinoimpuun di ko 29tw Kotolu katatalib. Pelan Kopotundaan SMJ diti momodolundung di mogisusuai pelan ‘sektoral’ di poinharo mantad. Kopiongoi nogi ilo’ di pelan id nayatan nasional om global ilo’ nopo nga’ ‘Wawasan Kemakmuran Bersama 2030 (WKB2030)’ om ‘Sustainable Development Goals 2030 (SDG2030),” ka disio.
Pinointalang disio do pelan diti i ginirot di tolu hal ilo’ nopo nga’S: Siktor Tosuul Monoguang Kosunion Ikonomi (Sektor Utama Fokus Pertumbuhan ekonomi) ilo’ nopo nga’ Pomutanaman, Pomorunan om Ponombuluyan; M: Modal Insan om Kasasanangan Rayat om nogi’ J: Jaringan Infrastruktur om Kelestarian Hijau.
Pointonod nowonsoi pelan dilo’, ka disio, mogisusuai pinggisoman id sahau hal ngaawi’ diti i nakapanahak koundaran kumaa rayat id pogun Sabah.
“Molohingon Pogun kaagal do dolundung pisompuruan i momodolundung koinsanai rayat amu’ momuntuk di tinaru, sinakagon toi ugama’. Oinsanan rayat mongunsikou kopio di kaadangon om piuludan koposion i nopurimanan mantad tungkusan. Kopurimanan doun tokou om mogipapantang id nayatan rayat pogun Sabah nopo nga’ koyuon koubasanan koposion i tilombuson tokou patanom om mindalan.
“Koporintaan pogun om oinsanan rayat, tumaru do popotungu poinponu’ kotiu’on i ouli’ kumaa di Molohingon Pogun montok tumilombus momodolundung pogun Sabah koupusan diti,” ka disio.
Minongunsikou nogi’ isio om bayahan kumaa oinsanan mamaramit darjah-darjah kebesaran, bintang om pingat kapantangan pogun.
Kalansanan disio o kinapamaga’an diti koposindak po do sunduan om ninggisoman oinsanan mamaramit gaa’ do tumilombus papatahak kouhupan om monginggirot pinggisoman montok mogiuhup popoburu’ pogun Sabah di koupusan mooi do pogun diti kotilombus koburu’, kotunda’, otoronong om oulud.
I bagas Luguan Montiri, Tan Sri Muhyiddin Yassin om sawo Puan Sri Nooraineee Haji Abdul Rahman; Speaker Dewan Koundangan Pogun Sabah, Datuk Haji Kadzim Haji M. Yahya om sawo i Datin Noraini Haji Salleh; Kumoduo Boyoon Montiri I, Datuk Seri Bung Moktar Radin om sawo Datin seri Panglima Nor asidah Alimuddin; Kumoduo Boyoon Montiri III po nogi’ Montiri Kopotundaan Pomorunan om Ponorikohon Komitikuasa’ Induk Kounsol Kapamaramaian tadau Kinouliton Poinbida’ ko-68 di Molohingon Pogun Sabah, Datuk Dr. Joachim Gunsalam om sawo Datin Linda Ewit; Hakim Tagayo Sabah om Sarawak, Dato’ Abang Iskandar Abang Hashim; Luguan Monunurat Negara, Tan Sri Mohd. Zuki ali om sawo Puan Sri Norizam Che Mohd Nor, o wookon di nokotindapou.
