KOTA KINABALU: Do po’ompus timpu koporintaan pogun monorisid om mogintong kawagu naangayan imunisasi id watas ngaawi’ i amu’ po nokosigampot 60% ginumu’ mogigiyon i nogonop vaksin.
Montiri Koporintaan Nokoiyonon om Pomuwalaian, Datuk Seri Masidi Manjun minoboros, watas i nokoponigampot rikoton dilo’ miampai poinpoopori kapasaga’ di mogigiyon do mamanau id watas zon di pinatatap.
Di konihab, pinopoilo isio do 9 watas potimporon id ‘status’ sabaagi songinan watas om amu’ poinsuang doid nombo-nombo zon soira’ Sabah minundaliu kuminaa sistem zon pointonod di tadau baino’ (1tw Kohopod).
Watas nopo dilo’ nga’ Kinabatangan, Telupid, Tongod, Sandakan, Kalabakan, Tawau, Papar, Semporna om Nabawan i pinosompini’ sabaagi watas sompoopori (stand alone district).
“Iti sabab no do watas ngaawi’ diti kakal amu’ nokoponigampot ginumu’ 60% vaksinasi nogonop montok mogigiyon nosukod,” ka di Masidi pinopointalang id kointalangan media disio.
Momoboros Covid-19 Sabah dilo’ pinopoilo, kinosimbanon kuminaa sistem zon dilo’ kopogompit do 18 watas i pinibahagi kuminaa limo watas zon.
Pinointalang disio, mimpuun ko 1tw Kohopod, Kota Kinabalu, Penampang, Putatan, Tuaran, Ranau om Kota Belud kosili Zon 1, naamot Beaufort, Sipitang om Kuala Penyu id Zon 2; Kudat, Kota Marudu, Pitas om Beluran id Zon 3; Lahad Datu om Kunak id Zon 4; om id sahau Zon 5 nopo nga’ Keningau, Tambunan om Tenom.
Tadau baino’ nopo nga’ pinonimpuunan kopoindalanan sistem dumarapas wats id zon.
“Kopoluhawan diti winonsoi montok monguhup poposindak kawagu tongo’ ababayan ikonomi rayat i agayo kinoumpadanon gagama’ do Covid,” ka di Masidi.
“Amu’ tokou po nakalantoi pisangadan sumahap virus Covid-19. Kalansanan kopio koluhawon pamanahan diti okito do mogigiyon sabaagi popoiliu tonggungan id lihawa diolo’ montok papatantu’ kotonudan poinponu’ di koinsanai kooturan kopoindalanan pinatantu’ (SOP) om koponuhuan Komontirian Kolidasan (KKM).
“Vaksin amu’ kopongumolig tokou do 100% mantad korolihan virus Covid-19. I kopomogonop pongumoligan nopo nga’ pogoyuon tokou sondiri montok toririmo mongumolig tinan tokou om paganakan tokou mantad kopogkorolihan,” ka di Masidi.
