CYBERJAYA: Kopihondot karamaian Tadau Kabansaan, bohogian pomorunan telekomunikasi (piromutan) om koposolimbahan pinoposodia’ pipiro pakej pomoruhang montok kogogonopan rayat.
Tumanud do Suruhanjaya Piromutan om Multimedia Malaysia (MCMC), iti kaampai no kopouyuhan ‘Pakej Peranti RM1 Malaysia Prihatin’ montok papasaga’ toinsanan rayat Malaysia sumanganu toi monginwagu mogisusuai kogogonopan piowit-owit om monokodung 4G om VoLTE, mimpuun do RM1.
Komponi telekomunikasi i maganu bohogian nopo nga’ Celcom, Digi, Maxis, Telekom Malaysia, U Mobile om YTL, ka do MCMA id kointalangan media di tadau baino’.
Celcom, Digi, Maxis, U Mobile om Telekom Malaysia nga’ manahak nogi’ do data tadau-adau soginumu’ 1GB do aiso’ kabayar kumaa koinsanai momoguno surupukaraja’ noputan gisom ko 31tw Kohopod om Duo 2021.
Suai ko ilo’, montok pinggisaman ‘Learn From Home’ (LFH) do YTL id kosokodungan sistem balajaran, oputan nogi ilo’ gisom ko 31tw Kohopod om Duo 2021.
Nogi’, sokodung po’ompus montok pakej ‘Jaringan Prihatin’ i noputan gisom ko 30tw Kosiam 2021 montok tinimungan B40; om “kapanahakan piromutan tiintangan do aiso’ kabayar pipiro ‘saluran premium’ nopili’ di komponi poposolimbou swasta miagal do Astro om Unifi patahakon kumaa moomoguno diolo’.
“Astro nga’ poposodia’ nogi’ do saluran aiso’ kabayar, Astro 25 id saluran 100, i poposodia’ suang nokoiyonon kapaampai do kinolubukan, sunduan patriotik nogi’ kinalantaion i nosigampot do Malaysia,” ka do MCMC.
Ka do kointalangan dilo’, pakej ngaawi i pouyuhon diti pikikiro kapanahak kogogonopan om koundaran kumaa rayat montok monoguang kinosimbanon koyuon kaawagu id balajaran, pakarajaan om ogumu’ po i suai, suai ko’ monginggaan tonggungan balanja’ tongo’ moomoguno.
