PETALING JAYA: Yang di-Pertuan Agong Al-Sultan Abdullah Ri’ayatuddin Al-Mustafa Billah Shah monuhu’ mooi do luguan montiri (PM) kosiam i silihon kiguno sumikap popotoguang atag undi otumbayaan (undi percaya) id Dewan Rakyat montok popokito kosokodungan di karaja’ disio.
Tumanud do Utusan Malaysia, id iso’ kopointalangan pinalabus di Datuk Pengelola Bijaya Istana Negara, Datuk Ahmad Fadli Shamsuddin minoboros, i Seri Paduka momonsoi koposilihan luguan montiri wagu tumanud Perkara 40(2)(a) om 43(2)(a)Koundangan Pisompuruan soira’ nokoponorisid di ‘akuan’ i posukuon do puru ngaawi’ Dewan Rakyat popoilo isai diolo’ i onuan kotumbayaan montok mongigit karaja’ dilo’.
Minoboros isio, surat akuan dilo’ kituduan monguhup di Yang di-Pertuan Agong momonsoi kootusan poposili songulun puru Dewan Rakyat i id pomusarahan di Seri Paduka pikikiro karamit kotumbayaan kogumuan (majoriti) puru Dewan Rakyat miagal di pinatantu’ id sahau Perkara 43(2)(a) Koundangan Pisompuruan.
“Luguan Montiri i sinili di baginda tumanud Perkara 40(2)(a) om 43(2)(a) Koundangan Pisompuruan mositi’ no do osisikap popotoguang atag undi otumbayaan id Dewan Rakyat montok popoimagon do nakaanu majoriti puru Dewan Rakyat,” ka disio id kointalangan dilo’.
Di konihab, i Yang di-Pertuan Agong om i Sultan Perak, Sultan Nazrin Muizzuddin Shah nakasaga’ minamaramit kinotoguangan di tongo’ luguan om mongongobi’ parti pulitik tagayo suang pogun doid Istana Negara.
