TAWAU: Sikul Kabansaan (SK) Bergosong, Pulau Sebatik maan siliho’ do iso’ po Longkod Kuarantin om Kopongusapan Covid-19 (PKRC) id watas diti, kosuul montok susumakit amu’ songkuro awagatan id pulou dilo’ nosusuhut kinoinsawaton kes positif.
Upisor Kolidasan Tawau, Dr. G Navindran minoboros, bohogian disio minamalan mongukab PKRC kaawagu dilo’ montok monginsanang mogigiyon pulou di positif Covid-19 do maganu kopongusapan miampai amu’ nuru’ kumaa id tindal sasabab no do kinoiyonon PKRC di poinharo mantad osodu’.
Mantad kogogonopan dilo’, ka disio, susumakit amu’ nuru’ sumakai bot solinaid 30 minit do maganu kopongusapan ,potilombus dino koponoibau kopogkorolihan kumaa tulun suai di maso id pamanahan suai ko’ montok monoibau kokurion kogogonopan.
Tumanud disio, lobi 100 kes positif Covid-19 noilaan id Pulau Sebatik id timpu duo minggu’ nakatalib i minintonod mantad kinapamaramaian Tadau Tagayo Aidiladha, di kaawagu diti, soira ‘haro puru paganakan suminuang kuminaa Tawau, suai ko’ songkosuayan i minodiilisok suminuang.
Ka id Dr Navindran, bohogian disio kiharo kointalangan do ahal dilo’ soira’ tulun songkosuayan i noilaan positif minangakun suminuang kuminaa watas diti.
Kohondot dilo’, pinokianu disio mogigiyon id watas diti do amu’ papasaga’ tongo tompinai diolo’ mantad pogun sombol (Indonesia) do sumuang id Tawau montok naamot timpu.
“Okon ko’ mongugar tokou nga’ monguhup tokou do Walai Pongubtan Tawau monginsiriba’ tonggungan monompuan susumakit Covid-19 i mumu’-gumu’.
“Nung aiso’ kogunaan, kada’ tombului. Miagal do, haro kes tulun nolohing i amu’ insan labus walai nga’ norolihan soira’ kinakap (di mogogowit virus),” ka disio kawagu.
Id ahal di poinggompit, minoboros isio do kobolingkahangan kinosolotan id Longkod Panahakan Vaksin (PPV) Dewan Masyarakat Tawau minggu di nakatalib mantad no di amu’ kinotonudan do ginumuan minananud timpu pirubaan batos ponungkitan maya’ aplikasi MySejahtera.
Poingkuro po ka disio, kinosoloton dilo’ naantakan no id labus dewan, naamot koyuon pointamong id suang do dewan miampai SOP di toririmo posuulon.
“Haro i nonuan pirubaan batos jam 2 toi 4 sodopon nga’ ruminikot yolo’ do jam ko 8 kosuabon, om haro nogi’ i minogowit do songkolominan miampai angkab kaanu vaksinasi tumanud ‘walk-in’,” ka disio i pinopoilo do walk-in nopo nga’ montok no diolo’ i kiumur 60 toun poingkawas do noondo diti
