KOTA KINABALU: Koporintaan Pogun Sabah om Amerika Syarikat (AS) toririmo manamong piromutan misulak di osonong om osuau.
Id nayatan pialatan pomogunan nopo, Malaysia om AS nokopiromut no do piromutan misulak pointonod podi 1957.
AS potilombus sabaagi tambalut pidagangan bobos agayo id pomogunan diti om Malaysia nopo nga’ iso’ tambalut laid nogi’ bobos osomok do pomogunan dilo’ id pisokodungan kapaampai kaganaan doun susumangod, kopoopuan, ikonomi om balajaran.
Kaawagu id pisokodungan misulak dilo’, AS pinopotoluod do soginumu’ iso’ riong dos vaksin kumaa Malaysia om minamatos do pomoruhang ponguhupan Covid-19 kumaa Wulan Sumilau Aragang Malaysia (BSMM).
I Boyoon Montiri, Datuk Seri Hajiji Haji Noor pinopolombus kopongunsikohan idlo’ kumaa id Lansanon Takawas AS kumaa Malaysia, Brian D. Mcfeeters, ontok miniromut maya’ internet do hiti di konihab.
“Monongkounsikou yahai kumaa koinsanai ponguhupan i pinatahak do Amerika Syarikat kumaa Malaysia om Sabah id kaganaan balajaran, koponondulianan gompi’ sandad posorili’ om i kaawagu ponguhupan montok manangod Covid-19.
“Ponguhupan diti koponginsikap po do pinggisaman dahai id koponoguangan kaantaban nosusuhut kinopogkorolihan tomporuruol Covid-19,” ka disio id kointalangan media.
I Hajiji minongunsikou nogi’ batos di lansanon takawas soginumu’ do USD1 riong sabaagi pinggisoman ponondulian gompi’ mamamasi lalang id Sabah montok momogonop ababayan pongumoligan mamamasi lalang i masaan poindalanon doid pogun diti.
Mcfeeters nga’ pinopouyu nogi’ do kosokodungan misompuru id kopomogompian talun i kapaampai do ababayan ‘Heart of Borneo’ (HoB), pinggisaman kopomogompian talun padarapas piwolitan miampai poinggayo gisom no id Brunei Darussalam, Indonesia om Malaysia sondiri.
Io’ Hajiji dii Mcfeeters nga’ miniboros nogi’ di mogisusuai ahal kaampai Pibatosan Malaysia 1963 (MA63), pamadagangan tulun, modidikot aiso’ kasagaan, om pisokodungan Lansanon Takawas Amerika Syarikat miampai Univositi Malaysia Sabah (UMS) montok monoibau kapagkaraatan.
Mcfeeters i mogowit karaja’ sabaagi Lansanon Takawas AS kumaa Malaysia di wulan Koduo toun diti, minoboros do amu’ no isio kotoron montok rumikot id Sabah ilo’ nopo nga’ totombuluyon nointutunan id nayatan rayat pomogunan disio sabab no do pongimbayat sandad posorili’ om Nulu Kinabalu.
