KOTA KINABALU: Songulun kusai kiumur 57 toun dinawa doid Kuut Majistret do hiti mantad totondos pinopokito simbol (kointutunan), lambang om lencana songinan kotinanan i amu’ poinrojistor doid Koupisan Porojistoran Kotinanan.
I Zulmin Marzuki tinondos pinopowonsoi kasalaan dilo’ di jaam ko 5.50 sodopon di ko 5tw Kowalu’ id koiyonon popokingan korita’ Blok A, Lorong Cyber Square 1, Jalan Lintas Kepayan, do hiti.
Totondos pinopointalang do i Zulmin tuminotomod pinopokito simbol, lambang om lencana ‘MU CHI RHO’ i amu’ pinolulus do Koupisan Porojistoran Kotinanan (RoS) toi minanahub nombo-nombo kooturan RoS.
Poingkuro po, aiso’ pinongokunan nanu mantad di Zulmin, i id lukap pulis longkod doid Kepayan, soira’ binasa’ kumaa disio totondos dilo’ maya’ pitimbungakan video.
Totondos id sahau Seksyen 50(3) Akta Kotinanan 1966 dilo’ koowit ukuman jiil gisom tolu wulan toi danda’ gisom RM3,000, nung gompit kasalaan.
Pamadawaan pinapaatag kogos jamin RM4,000 om duo mamajamin.
I Zulmin i amu’ nobian, minokinsian mooi do kogos jamin dilo’ ingkurian.
Majistret Lovely Natasha Charles pinapatatap do ko 9tw Kosiam montok kopomoroitan om pinopoidu’ di Zulmin miampai kogos jamin RM1,000 om duo mamajamin.
Id kes suai, tolu kusai dinanda’ soginumu’ RM8,600 tu’ pasanganu do syabu.
I Sharul Kair, 28, Sahiron Usman, 48, om i Saibin Unos, 30, sopipoopori minangakun nakalasa’ pasanganu syabu kiwinagat 0.23 gram, 0.05 gram om 0.06 gram, di pialatan ko 25tw Kotolu om ko 21tw Ko’onom toun diti id kinoiyonon di sopisuaian doid Penampang, longkod kakadayan tagayo om Menggatal.
I Sharul dinanda’ RM3,000 toi jiil 12 wulan naamot io’ Sahiron dii Saibin sopipoopori dinanda’ RM2,800 toi jiil turu’ wulan.
Nobian yolo’ di luyar sinili i Lim Ming Zoong @ Lawrence.
Totondos kumaa diolo’ winonsoi id sahau Seksyen 12(2) Akta Dadah Kopoligogon i koposodia’ danda’ gisom RM100,000 toi jiil gisom limo toun toi goduduo dilo’, nung gompit kasalaan.
I Inspektor Lim Swee Beng pinopoindalan pamadawaan
