Masidi Manjun
KOTA KINABALU: Koinsanai surupukaraja’ kiguno om amu’ nuru’ id siktor kapamansaian, ponuridongan, pongukadan om kuari maan pasagao’ mongukab miampai gontob poinponu’ nung 80 toi 100 pihatus kukumaraja’ dilo’ nogonopan vaksin, sabaagi wookon mantad Kooturan Kopoindalanan Pinatantu’ (SOP) kaawagu Kounsol Koumoligan Pogun (MKN) i nulud di konihab.
Momoboros Covid-19 Sabah, Datuk Seri Masidi Manjun minoboros nung 60 gisom 79 pihatus pakakaraja’ nonuan vaksin, siktor ngaawi’ dilo’ pasagaon no do mongukab miampai rinumpos 80 pihatus.
Suai dilo’, 13 po pongindopuan id sahau siktor pidagangan om kopoikidan pasagaon do mongukab, miampai timpu pongindopuan mimpuun jam ko 6 kosuabon gisom ko 8 totuong.
Iti kaampai no kadai kakamot sipoot, kadai posokoton, fisin om ‘aksesori’, kadai babarang kemas, kadai babarang fotografi om surupukaraja’ fotografi, kadai babarang noguno om kadai tinunturu’ nogi’ tanda’mato.
I nopo suai nga’ kadai babarang ‘antik’, kadai gigianak, kadai karpet, kadai rinumpos kreatif, kadai kakamot labus, kadai panamangan kulit om tumau wongi’ om kadai sigup.
“Koinsanai ‘subsektor’ diti pasagaon mongukab miampai kosudongan koinsanai momooboli om pakakaraja’ nakaanu sokukuri’ do iso’ dos vaksin om mositi’ diolo’ momogonop vaksinasi id timpu di pinatahak gisom ko 15tw Kosiam,” ka di Masidi id kointalangan, di konihab.
