SANDAKAN: Pulis do hiti minanahan apat kusai i sopipoopori doribal om susumakai duo tinan padsakaian i kotumbayaan pinapanau do amu’ minonodsorou om kopoligogon doid Jalan Ulu Sibuga, doros hiti, sodopo tadau Minggu’ nakatalib.
Luguan Bohogian Ponoriukan om Kopogirotankuasa’ Trafik (BSPT) Longkod Upis Pulis Watas (IPD) Sandakan, ASP Freedy Untun, minoboros pinanahanan dilo’ winonsoi id Op Samseng Jalanan i pinoindalan do BSPT miampai tolu upisor om23 puru disio kikiro jam ko 4.30 sodopon gisom ko 6.30 sodopon tadau Minggu’ nakatalib id kinoiyonon dilo’.
Ilo’ po nogi’ nga’ mantad pinonoludukan om kointalangan ginumuan i naramit do bohogian disio.
Pinointalang disio, goduduo padsakaian om apat i tinahan dilo’ soriukon id sahau Seksyen 42 Akta Padsakaian Ralan 1987 ilo’ nopo nga’ pinopoibok do amu’ monodsorou om kopoligogon hinombo do nung gompit kasalaan kumoinsan, momumusala’ aanu mongukum jiil amu’ katalib limo toun om danda’ amu’ katalib RM15,000.
Montok kasalaan kumoinduo om potilombus dilo’, momumusala’ aanu momojiil amu’ katalib 10 toun om dandaon amu’ katalib RM20,000.
Momumusala’ nga’ kasaga’ nogi’ do atagakan kopotutan popoibok solinaid amu’ oruhai mantad duo toun mintonod tadau kinopogompitan.
Id operasi di miagal, walu’ tinan padsakaian mitonggoi 12 tulun nga’ tinahan om maan soriuko’ id sahau Seksyen 81(3) Akta Padsakaian Ralan 1976 ilo’ nopo nga’ minaganu bohogian id nunu-nunu pialaan toi koponiisan siniau.
Nung gompit kasalaan kumoinsan, momumusala’ aanu mamadanda’ amu’ katalib RM2,000 toi jiil amu’ katalib onom wulan toi ngoduduo dilo’.
Atagakan nogi yolo’ do kopotutan mongigit lisin popoibok montok timpu amu’ katalib sontoun.
Nung gompi kasalaan kumoinduo, momumusala’ aanu mamadanda’ amu’ katalib RM5,000 toi jiil amu’ katalib sontoun om atagakan kopotutan popoibok amu’ katalib tolu toun.
Minoboros i Freedy dilo’ soira’ rinubaan media id luan IPD Sandakan di sodop tadau Minggu’ katalib minomonsoi pinomorisaan dilo’ kohondot di padsakaian om yolo’ i tinahan dilo’.
Soginumu’ do 14 kaping saman modtinalib nga’ pinalabus kohondot mogisusuai kasalaan wookon nopo nga’ minonimban ekzos om plat rojistor amu’ tumanud kooturan.
Ka disio, koinsanai ginambit aiso’ dadah mantad pinoniisan waig sobu i pinoindalan kumaa diolo’.
Ka disio, koinsanai ginambit dilo’ kinompaun id sahau kasalaan-kasalaan suai i pinosodia’ id kooturan kopoindalanan pinatantu’ (SOP) Kounsol Koumoligan Pogun (MKN) ilo’ nopo nga’ luminabus do aiso’ padaahan di poinpatut id timpu fasa ponondulian koduo Palan Ponondulian Pogun (PPN) id saha kooturan 17(1) Akta Kopongilagan Pagantaban Tomporuruol Mogkoroliu 1988 i aanu mamadanda’ giosm RM2,000 songulun.
Koinsanai di tinahan, kapaampai songulun tondu om 15 kusai id umuran 20 – 40 toun dilo’ pinoidu’ miampai jominan pulis naamot mindad koponguludan kes.
Tongo’ padsakaian di naahou maan posukuo’ kumaa Koupisan Padsakaian Ralan montok pomorisaan teknikal.
