Salleh Said Keruak
KOTA KINABALU: Aiso’ parti pulitik i okito kaanu monuridong koporintaan do poinpoopori.
Ponorikohon Kelab Monokodung Gabungan Rakyat Sabah (GRS), Datuk Seri Salleh Said Keruak minoboros, koyuon nopo dilo’ nga’ ahal otopot kumaa pulitik pomogunon do noondo diti.
Kinotu’ mantad status disio id Facebook di kosuabon baino’, i Puru Lintuhun Koundangna Pogun (ADUN) Usukan dilo’ minoboros, haro kogunaan montok koponguludan kawagu om pogititimbangan kapaampai toinsanan bohogian.
“Nga’ buntukon tosuul mositi’ kumaa koponondulianan.
“Parti pulitik kiguno momusorou do ahal diti om monongkotumbayaan di Yang di-Pertuan Agong (YDPA) montok momili’ Luguan Montiri i mongigit tonggungan diti.
“Luguan Montiri wagu kaanu monimbang montok monuridong kabinet di okoro, abaal om sopisuai parti (bipartisan) montok monuridong do ginaras,” ka disio.
Di konihab, i Ponorikohon Perikatan Nasional (PN) Tan Sri Muhyiddin Yassin minongiliu karaja’ soira’ nakaanu kapasagaan mantad di YDPA, Sultan Abdullha Ri’ayatuddin Al-Mustafa Billah Shah.
Kinopongilihan karaja’ disio dilo’ sinusuhut di nuludan kabinet di suai nga’ i Muhyiddin sinili di Baginda montok mongigit Luguan Montiri Naamot (caretaker) pogulu koposilihan Luguan Montiri di wagu id timpu toruhai.
