Masidi Manjun
KOTA KINABALU: Koporintaan Pogun minongunsub tulun ginumuan mooi do maganu kopomodulianan di pointotopot do Kooturan Kopoindalanan Pinatantu’ (SOP) Covid-19, sundung pia do nokopomogonop ngoduduo dos vaksin.
Momoboros Covid-19 Sabah, Datuk Seri Masidi Manjun (gambar) minoboros mantad di 1,002 kes wagu i nokosurat id Sabah di tadau Minggu’, 181 nakaanu vaksin, hinombo do 94 i nakaramit dos kumoiso’ om 87 i nokopomogonop ngoduduo dos.
“Koyuon diti kapaatag do amu’ kotonudan kumaa SOP kakal koowit diolo’ i nakaramit vaksin orolihan Covid-19.
“Kotonudan SOP mositi podulion pointopot do mogigiyon id pinggisoman toinsanan do papamanau tonggungan id kapantalaban tomporuruol, i babiano’ diti nokoinsawat id Sabah,” ka di Maisi id iso’ kointalangan, konihab.
Minoboros isio Komontirian Kolidasan Malaysia (KKM) nga’ popounsub nogi’ kotonudan SOP di poinponu’ sabaagi kopongilagan orolihan Covid-19, ka disio kawagu disiplin tinan id kapawansaian dilo’ nopo nga’ osuul suai ko’ mantad vaksin poinggonop.
Naamot dilo’, minoboros i Masidi do Koporintaan Pogun mongingkawas gontob vaksinasi kumaa 50,000 dos sangadau id pinggisoman mamagampot pongumoligan mogigiyon id Sabah do osisikap.
“Koupisan Kolidasan Pogun minanahak soginumu’ 43,792 dos vaksin di tadau Koonom, katatalib.
“Tikid tadau minggisom tokou momoruhang ginoris koupisan kolidasan montok manahak vaksin.
Mongingkawas tokou do ginumu’ katalib 50,000 dos sangadau.
“Ginumu’ bobos takawas imunisasi om pangaba’ vaksin di amu’ noinggongohan kapasaga’ do Sabah mamagampot pongumoligan mogigiyon do lobi kosikap,” ka disio.
Naamot dilo’, turu’ kinapataion nokosurat id Sabah di tadau Minggu’ miampai duo id Penampang om sopi’iso’ id Beluran, Papar, Semporna, Kinabatangan om Kota Kinabalu.
Kokomoi di kes tadau-adau Sabah, ka id Masidi, romut osomok potilombus nosili momoruhang bobos togumu’ miampai 591 kes, kopiagal do 59 pihatus mantad tintob kes dilo’.
Kota Kinabalu nokoponotulu nuludan miampai 171 kes, sinusuhut do Tawau miampai 171 kes, Penampang miampai 100 kes om Sipitang 90 kes.
“Id Kota Kinabalu, somok 63 pihatus di kes dilo’ mantad romut osomok, naamot 70 pihatus mantad Kes id Tawau, 67 pihatus mantad kes id Penampang om 62 pihatus mantad kes id Sipitang nopo nga’ romut osomok.
“Data diti kopokito kinopogkorolihan Covid-19 nakatayad id nayatan mogigiyon. Iti nopo nga’ aanu pisowiton di pihotusan akaws kes kitanda’, ilo’ nopo nga’ 18.36 pihatus (184 kes),” ka disio.
“Mantad di 1,002 tintob kes, 17 kes kopogompit do bagang kiumur amu’ kosontoun, 78 kopogompit iso’ gisom limo toun, 211 kopogompit onom gisom 17 toun, 621 kopogompit 10-59 toun naamot 75 kes kopogompit 60 toun poingkawas.
Minoboros nogi’ i Masidi do 72.45 pihatus mantad kes nopo nga’ id bohogian iso’ (285 kes) om bohogian koduo (441 kes), ilo’ nopo nga’ kes aiso’ tanda’ gisom kitanda’ agaan i amu’ momoguno pongusapan id walai pongubatan.
Kokomoi 10 kes wagu i noilaan id kinoiyonon poingusuk Long Pasia, ka di Masidi siam mantad diolo’ amu’ navaksin om songulun kawagu nokopomogonop ngoduduo dos vaksin.
“Poigkuro po, Koporintaan Pogun pinopoindalan Ababayan Jiwa Murni (progam vaksinasi) mantad 24 gisom ko 26tw Koonom (do koiso’) om 14 gisom ko 17tw Koturu’ (do koduo) id poliliput kampung dilo’,” ka di Masidi.
Naamot dilo’, duo kluster wagu noilaan id Telupid om Keningau, ilo’ nopo nga’ Kluster Tembidong Bidong om Kluster Jalan Patikang Ulu.
Kluster Tembidong Bidongid Telupid nointonod di ababayan mogitotombului ontok kapamaramaian Tadau Raya Aidiladha di kaawagu diti, nokointonod mantad songulun tondu kiumur 55 toun.
Noilaan isio do positif di ko 19tw Koturu’ id Walai Pongubatan Duchess of Kent id Sandakan, soira’ pinosuku’ do hilo’ di Kolinik Kolidasan Nangoh soira’ kiharo tanda’ mongikod om osolot momuhobo pointonod di ko 17tw Koturu’.
Minoboros i Masidi do tondu’ dilo’ nga’ minongkoroliu nogi’ di sawo dau, i po nogi’ wookon mantad di 18 romut osomok i tiniis positif di ko 21tw Koturu’. Gisom babaino’ diti, 292 romut di pinorisa’ hinombo do 88 noilaan do positif.
Kluster Jalan Patikang Ulu id Keningau, nakapaampai kinorolihan id karajaon, minimpuun mantad songulun karani kusai kiumur 19 toun id songinan komponi bengkel om ‘servis’ injin awagat.
Notiis yau do positif id iso’ pinomorisaan kitanda’ doid songinan klinik swasta di ko 29tw Koturu’. Ontok tadau di miagal, klinik dilo’ minongilo do iso’ kawagu kes positif, i po nogi’ romut osomok di susumakit indeks.
“Haro 17 kes id kluster diti gisom do babaino’ diti, nakapaampai diolo’ i mantad Mukim Patikang om Lingkudau id Keningau. Kinoingkawason kes kotumbayaan mantad no do pinogiomboobolutan id nayatan mongingiyon songinan walai siwa’ i osolot doid Jalan Patikang Ulu,” ka di Masidi pinopointalang.
Naamot dilo’, duo kinoiyonon pino’iliu id sahau Ponuhuan Kapanamangan Pamanahan Pinoinggirot (PKPD) mimpuun ko 3 gisom ko 16tw Kowalu’, ilo’ nopo nga’ Perumahan Ladang Hibumas 2 id Mukim Sungai-Sungai, Beluran om Kg Tagibang id Kota Marudu.
PKPD id Ladang Agathis, Kalabakan, Kg Nosoob, Penampang, Kg Gusung, Likas om Kg Bakalau, Beaufort oputan mimpuun suab gisom ko 16tw Kowalu’.
PKPD id 10 kinoiyonon pinupusan di tadau baino’ (2tw Kowalu) ilo’ nopo nga’ tolu id Likas (Taman Teluk Likas, Taman Kurnia Jaya om kuarters pakakaraja’ Kilang Permai Kaya), Kg Long Kiangan, Kg Ranau-Ranau, Kg Solob om Kg Tunas Baru id Sipitang, Kg Muhibbah id Beaufort nogi’ Kg Dandulit Matunggong id Kudat.
Kokomoi Ababayan Imunisasi Covid-19 Kebangsaan montok Sabah, id sahau fasa duo, 44,639 tulun nakaramit dos koiso’, nokoposili tintob notimung 797,180 naamot 3,661 nakaramit dos koduo, nokoposili tintob notimung kuminaa 337,338.
