KOTA KINABALU: Koporintaan Pogun mongingkawas po do ginaras kapanahakan vaksin Covid-19 gisom katalib 50,000 dos sangadau.
Montiri Koporintaan Nokoiyonon om Pomuwalaian, Datuk Seri Masidi Manjun minoboros, pinggisoman powonsoiyon tikid tadau montok mongingkawas ginaras Koupisan Kolidasan Pogun Sabah (JKNS) manahak vaksin kumaa tulun ginumuan.
“Di konihab, JKNS minanahak (administer) 43,792 dos vaksin.
“Imunisasi di ogumu’ nogi’ pangaba’ vaksin i amu’ oputut kapasaga’ Sabah monigampot pongumoligan mogigiyon miampai lobi kosikap,” ka di Masidi po nogi’ Momoboros Covid-19 Sabah.
Sabah luminaang kumaa wulan wagu Kowalu’ miampai tintob kes di kakal id apat numbur, ilo’ nopo nga’ 1,002.
Watas Kota Kinabalu om Tawau sopipoopori nokoposurat 171 kes wagu id suang timpu 24 jam di nakatalib.
Iti sinusuhut do watas Penampang miampai 100 kes, Sipitang 90, Sandakan 75, Tuaran 73, Keningau 47, sinusuhut do Telupid 40, Ranau 34, Papar 30, Beaufort 28 om Kinabatangan 22. Koinsanai watas nokoposurat kes wagu.
Haro duo kluster wagu di tadau baino’, ilo’ nopo nga’ Kluster Tembidong Bidong id Telupid / Beluran 88 kes (+35) (kluster komuniti) om Kluster Jalan Patikang Ulu id Keningau 17 kes (+3) kes (kluster id karajaon).
Romut osomok potilombus nokopomoruhang tintob bobos togumu’, 591 kes, ilo’ nopo nga’ somok 59%.
Id watas Kota Kinabalu somok 63% kes wagu mantad no di romut osomok, 70% id Tawau, 67% id Penampang om 62% id Sipitang.
Ka id Masidi kointalangan diti kopokito koiyonon toi watas kopogkorolihan virus Covid-19 maral-ralad doid nayatan mogigiyon.
“Kopikikiraan diti noinggirotan po di tintob pihotusan di akaws, 18.4% (184) id nayatan bohogian ‘kitanda’. Kopogkorolihan bohogian diti nopo nga’ kes sporadik, ilo’ nopo nga’ intodonon kinorolihan amu’ noilaan. Kes di nokopogompit kluster nopo nga’ 13.3% (133) no om pomorisaan pobuntukon 5.5% (55) mantad tintob koinsanai.
“ Mantad no do kointalangan ngaawi’ id kawas i naanu mantad pinonorisidan kointalangan ngaawi’ id kinoiyonon, Komontirian Kolidasan Malaysia (KKM) papaanjur kotonudan miampai pohimagon di koinsanai kooturan kopoindalanan pinatantu’ (SOP) montok mongilag dati’ do orolihan virus Covid-19 diti.
“Disiplin tinan nopo nga’ haal kapanamangan kolidasan tinan di oponsol kopio suai ko’ kogunaan maganu vaksinasi di ogonop,” ka disio.
Tintob kes tumanud watas:
Kota Kinabalu 171
Tawau 171
Penampang 100
Sipitang 90
Sandakan 75
Tuaran 73
Keningau 47
Telupid 40
Ranau 34
Papar 30
Beaufort 28
Kinabatangan 22
Putatan 17
Kota Marudu 17
Kudat 16
Kota Belud 15
Lahad Datu 10
Kuala Penyu 9
Kunak 7
Beluran 7
Tenom 7
Kalabakan 5
Tongod 4
Semporna 3
Tambunan 2
Nabawan 1
Pitas 1
Kluster Wagu
Kluster Tembidong Bidong (Telupid, Beluran) 88(+35)
Kluster Jln Patikang Ulu, Keningau 17(+3)
