Masidi Manjun
KOTA KINABALU: Koporintaan Pogun momili’ montok amu’ popoindalan ‘lockdown’ id Sabah sundung pia do kes kaawagu Covid-19 id pogun diti kotilombus koinsawat, nosusuhut kinopogkorolihan id nayatan mogigiyon.
Sabalik dino, koposuulan nopo nga’ kumaa mongingkawas gontob vaksinasi id nayatan mogigiyon montok papasaga’ pogun koponigampot ‘imuniti kelompok’ (pongumoligan mogigiyon) nogi’ kopoinggirotan kuasa kotonudan SOP miampai kiwaya’ i noilaan lobi kiwaya’ monginsiriba’ tintob korolihan.
Montiri Koporintaan Nokoiyonon om Pomuwalaian, Datuk Seri Masidi Manjun minoboros, virus Covid-19 haro no doid mogigiyon.
“Iti kirati do lobi kasanang om lobi kogumu’ tulun di orolihan. Kopomorisan poinggayo i winonsoi do Koupisan Kolidasan Pogun Sabah (JKNS) nokopokito pomusarahan diti.
‘Mumu’-gumu’ pomorisaan di poindalanon nga’ mumu’-gumu’ kes positif wag di oilaan.
Pogulu, korolihon nopo nga’ ‘localised’ om tintob dilo’ amu’ ogumu’,” ka disio id kointalangan media di tadau baino’.
Masidi i po nogi’ Momoboros Covid-19 Sabah pinopoilo, romut osomok nosili nodii do tinimungan bobos takawas kes tikid tadau, ilo’ nopo nga’ 60 pihatus di ko 30tw Koturu’ 2021.
Romut osomok diti nopo nga’ haro piromutan di tongo’ tambalut diolo’ sondiri (circle of friends), ka disio kawagu.
“Yolo’ pikikiro do nokopogkoroliu di tongo’ tambalut diolo’ di suai nogi. Iti nokoowit tintob kes tikid tadau nopilipat, ilo’ nopo nga’ waya’ mantad ‘multiplier effect’.
“Asil dilo’ tintob positif wagu nokoinsawat sabab mayo-gayo o kopomorisaan di kiguno do poindalanon do JKNS,” ka disio pinopointalang.
“Soira’ virus Covied-19 haro no id mogigiyon, ‘lockdown’ okon nodii ko’ karalano’ di kiwaya’ montok manalob kopogkorolihan. Tikid mantad dati’ miampai amu’ kopuriman pikikiro doti’ do nosili no do mongongowit virus, amu’ mimud do nakaanu tokou vaksin toi amu’ po.
“’Everyone of us is now a potential virus carrier’. Kopogkoroliu tokou do tulun id pososorili’ dati’ sundung pia do dati’ id koyuon lockdown toi poingiyon id watas id sahau PKPD,” ka disio.
Tumanud disio, di pogulu lockdown nopo nga’ karalano’ di kiwaya’ sabab kopogkorolihan aantakan no id kinioyonon di kisapad toi ‘localised’ nga’ babaino’ kopogkorolihan haro id mogigiyon.
“Lockdown toi PKPD miampai poo’ompus somok nonopomidsala’ ikonomi dati’. Ogumu’ komponi ‘gulung tikar’ toi agayo kinorugian. Ogumu’ mogigiyon tokou natagakan intodonon koonuonuan om do babaino’ tumalahan kumaa ponguhupan koporintaan.
“Kumaraja’ yolo’ kawagu montok mamalanja paganakan diolo’. Kogoosan do koporintaan montok tumilombus manahak ponguhupan om subsidi kisapad nodii. Kiguno tokou popiadas masi om koposion. ‘We have to balance lives and livelihood’. Om iti amu’ aanu popowonsoi maya’ karalanon lockdown toi PKPD nopo tomod,” ka di Masidi.
Ka disio, ralan do gumaga’ toi monoguang tomporuruol diti nopo nga’ kotonudan SOP om mongingkawas gontob vaksinasi id nayatan mogigiyon.
Ka disio, kogoosan JKNS montok manahak vaksin nokorikot no do gontob 50,000 dos sangadau om ingkawasan po gisom do 60,000 dos sangadau tumanud di sitok vaksin tokou.
“Rayat ‘nohuyan’ nodii id koyuon do ‘poinguung’ om pikikiro doti’ do kalawong mananud SOP.
“Kotonudan SOP di poinggirot kouhup dati’ do mongilag mantad orolihan. Vaksinasi kapanahak dati’ do ‘kabal’ mantad orolihan virus giosm 90 pihatus. Kakal tokou do orolihan nga’ wyaa’ dilo’ agaan (mild) om amu’ momoguno kopongusapan gisom kosuang id walai pongubatan. ‘It’s not life threatening’.
“Karalano’ do ponginsamakan tokou potilombus nopo nga’ tumanud di ahal ngaawi’ i nokointalang doid sawat.
“Lockdown nopo tomod nga’ amu’ kapanalasai kobolingkahangan kes kopogkorolihan i mumu’-gumu’. Ilo’ iso’ no ralan om okon ko’ i tisoiso’ no ralan lumabus mantad kopogkorolihan di nokoinggumu’. Di pogulu aiso’ sumpili’ tokou suai, suai ko’ mantad lockdown sabab aiso’ po vaksin,” ka disio.
Minoboros isio do kinoinsawaton gontob vaksinasi id nayatan mogigiyon Sabah montok papasaga’ pogun kosigampot pongumoligan mogigiyon om kopoinggirotan kuasa kotonudan SOP miampai kiwaya’ noilaan do lobi kiwaya’ koponginsiriba’ tintob kopogkorolihan tikid tadau id koyuon kinorolihon di nokosimban.
“Ponginsomokan diti nointalangan do kiwaya’. I nopo kiguno nga’ pangaba’ vaksin di korungod om timpu kapaatadan amu’ oinggangahan,” ka disio kawagu.
