Masidi Manjun
KOTA KINABALU: Koporintaan Pogun di tadau Kolimo pinapatantu’ montok manahak kapasagaan kumaa toinsanan komponi om pomorunan id Sabah do momoli pangaba’ vaksin Covid-19 miampai mitilombus montok monginsikap kapanahakan vaksin kumaa kukumaraja’ diolo’ sompoopori.
Momoboros Covid-19 Sabah, Datuk Seri Masidi Manjun minoboros, iti kaampai no vaksin Pfizer-BioNTech, Sinovac om AstraZeneca.
Ka disio, iti nopo nga’ kapasaga’ ababayan imunisasi poindalanon montok kukumaraja id premis karajaon i silihon do longkod kapanahakan vaksin naamot.
“Koupisan Kolidasan Pogun Sabah monguhup di tongo’ kolinik swasta do popoindalan ababayan imunisasi id premis karajaon toi kabun sompoopori,” ka disio id kointalangan do hiti di konihab.
Naamot dilo’, minoboros i Masidi do kes Covid-19 montok Sabah nokoporikod apat numbur miampai 1,066 di tadau Kolimo, bobos takawas do toun diti.
Onom kinapataion nokorikod id poliliput pogun ilo’ nopo nga’ tolu id Beaufort om sopipoopori iso’ id Sandakan, Kudat om Penampang.
Tumanud disio, 60 pihatus tintob kes nopo nga’ kapaampai do romut osomok miampai 640 kes, sinusuhut do 157 kes pinomorisaan kitanda’, 157 mantad kluster, 51 mantad pinomorisaan pinobuntuk om 61 mantad susuai pinomorisaan.
“Kota Kinabalu, i nokoposurat kes bobos takawas miampai 206, nokoporikod tintob bobos takawas romut osomok miampai 125 kes,” ka disio.
Ka wagu disio, 77.86 pihatus tintob kes nopo nga’ id Bohogian Iso’ om Bohogian Duo miampai sopipoopori 345 om 485 kes, i po nogi’ kes aiso’ tanda’ om agaan om amu’ momoguno kopongusapan doid walai pongubatan.
Minoboros i Masidi kikiro 545 susumakit Covid-19 pinapasaga’ lumabus mantad walai pongubatan naamot 3,984 susumakit kakal rumamit pongubatan id walai pongubatan om longkod ngaawi’ kuarantin om kopongusapan risiko osiriba’ (PKRC).
Naamot dilo’, duo kluster nointutunan id Tawau om ranau, ilo’ nopo nga’ Kluster Batu Dua om Kluster Jalan Gunsapau.
Kluster Batu Dua kapaampai kinopogkorolihan id karajaon ilo’ nopo nga’ songinan bakeri. Kluster dilo’ nokointonod mantad songulun kusai kiumur 58 toun mantad Batu 2, Lorong Habib Abdul Rahman. Noilaan isio positif id songinan walai pongubatan di ko 17tw Koturu’.
“Pinomorisaan romut osomok nokoilo do tolu puru paganakan sanwalai di positif, kaampai duo tanak dau i poingkaraja’ id bakeri dilo’.
Pinomorisaan id karajaon nokoilo do walu’ kawagu pakakaraja’ di positif,” ka di Masidi.
Minoboros isio kawagu, mantad di 66 romut i pinorisa’, 37 noilaan positif, naamot 36 sampel kakal mindad kootusan. I nopo suai nga’ negatif.
Kluster Gunsapau i nakapaampai kinopogkorolihan id mogigiyon, nokointonod mantad songulun tondu kiumur 24 toun i noilaan positif di ko 21tw Koturu’.
Apat kawagu romut osomok i pinorisa’ positif di ko 22tw Koturu’ maya’ pinomorisaan kitanda’ nogi’ romut id Kg Pugi Gunsapau id ranau nogi’ Kg Nanawon om Kg Tagibang id Kota Marudu.
“154 sampel di pinorisa’ om nokoilo do 64 positif, naamot i noopod 100 sampel minanahak kootusan negatif,” ka di Masidi.
Naamot dilo’, 22 kawagu kinoiyonon i pino’iliu id sahau Ponuhuan Kapanamangan Panau Kikooturan (PKPD) mimpuun ko 1 gisom ko 14tw Kowalu’, ilo’ nopo nga’ Kg Tempasuk 1 id Kota Belud, Kt Tengah Padang (Putatan), Kg Babagon (Penampang) om duo kinoiyonon id Kota Kinabalu ilo’ nopo nga’ Taman Sempelang om Kg Sembulan Tengah om Lama.
Nontok po nogi’ do PKPD o tolu kinoiyonon id Kudat ilo’ nopo nga’ Kg Seri Aman, Taman Orkid om Kg Damaran banggi; tolu kinoiyonon id Sandakan ilo nopo nga’ Kg Lupak Meluas darat, Kg Sundang Laut, Taman Sejati Flat nogi limo kinoiyonon id Keningau (kg Bariawa Laut, Kg Baitah, Kg Panagatan Ulu, Kg Kota Ayangan om Rumah Kongsi Jutaya Lingkudau).
Onom kinoyionon id Tawau nopo nga’ Bandar Sabindo, Kg Rancangan Sg Tongkang, Taman Kukusan, Batu 2 Lrg Habib Abdul Rahman Jln Apas, PPR Sri Semarak om Taman Berjaya.
Naamot dilo’, PKPD id Kg Siansai Dundau, Kota Belud oputan mimpuun do suab gisom tadau ko 14, naamot apat PKPD i pupusan ilo’ nopo nga’ Taman Ehsan PPR id Kudat, Kg Naruntung id Pitas, Kg Pinalobuh Bukid id Kota Belud nogi’ Ladang Await KLK Lungmanis om kuarters kilang id Mukim Silabukan, Lahad Datu.
Kokomoi Ababayan Imunisasi Covid-19 Kebangsaan id Sabah, id sahau fasa koduo, 35,000 tulun nakaramit ponungkitan dos kumoiso’, nokoposili tintob koinsnaia mamaramit kumaa 721,377 naamot 2,042 nakaramit ponungkitan koduo, nokoposili tintob koinsanai 329,466.
Kikiro 14,242 ruminojistor montok koonuan ponungkitan vaksin, di tadau Kolimo, nokoposili tintob koinsanai diolo’ i poinrojistor gisom babaino’ diti kuminaa 1,150,865 toi 41.7 pihatus.
