Hajiji Haji Noor
KENINGAU: Pomorunan sapi tenusu Sabah pikiikiro kotilombus koburu’ maya’ Longkod Ternakan Bersepadu Keningau (KILC), id sahau do Desa Keningau Livestock Industries Sdn Bhd (DKLI) i kotuturidong.
DKLI tinuridong soira’ Desa Cattle (Sabah) Sdn. Bhd, songinan komponi pasanganu poinponu’ pogun, minonowoli do KILC mantad Kotinanan Koburuon Ikonomi om Kopoopuan Sabah (SEDIA) di ko 1tw Koturu’.
“Do babaino’ Desa minonowoli projik diti, mongiikiro tokou do pomorunan sapi tenusu pogun koburu’,” ka di Boyoon Montiri (KM) Datuk Seri Hajiji Haji Noor.
“Iti nopo nga’ koponginggonop do projik pomogompian tenusu Desa di haro mantad id Kundasang, i noondo diti osonong kapapanaho’,” ka disio katalib tuminombului do KILC id Sook, do hiti di tadau Koduo.
HAJIJI minooi intong di ontok kinotombuluyan kuminaa id KILC.
Desa do babaino’ papamanau tonggungan oponsol montok popoinggayo pomorunan tenusu om sapi id Sabah.
Tintob tosopung kopoopuan modal i gunoon montok kopotundaan projik dilo’ pikikiro kiginumu’ RM`118 riong om pinibahagi do duo fasa.
Fasa koiso’ projik id sahau SEDIA kiginumu’ do RM57.3 riong nopongo di ko 19tw Kowalu’ 2013 maya’ sakadai mantad Pisompuruan.
Maya’ pinggisoman wagu diti, DKLI popowonsoi karaja’ kopoburuan miampai kos RM87.83 riong montok mongingkawas ginoris dau manampung 2,000 tinan sapi tenusu om daging sapi.
Mantad pasanganu koonuan montok popoiyon soginumu’ 2,000 sapi tenusu, DKIL momorikot kopolobusan susu tikid toun soginumu’ 8.5 riong liter om 1,000 tinan sapi i kopiagal do 500 tan metrik daging sapi sontoun.
