KAMPUNG Tanjung Aru Lama i noponu’ do rinomos.
KOTA KINABALU: Kiginumu’ do 800 kilogram rinomos pinuhu di onom tulun sukarelawan mantad tinan okon koporintaan (NGO), Koisaan Mesra Alam Sekitar Sabah (MASESA) miampai di 35 tulun mogigiyon Kampung Tanjung Aru Lama id pososorili’ pongingiyonon diolo’ id kampung dilo’ di konihab.
SUKARELAWAN masaan omuhu rinomos id Kampung Tanjung Aru Lama
Presiden MASESA, Ainie Jamin minoboros, ababayan i pinaanjur do bohogian disio miampai mogigiyon kampung dilo’ nopo nga’ montok manahak kopurimanan montok momurisi’ watas id pososorili’ kinoiyonon diolo’ i noponu’ do rinomos.
“Koisaan dahai pogulu diti nokopoindalan ogumu’ ababayan kokomoi kopurimanan manamong koburision sandad posorili’ lolobi no miampai do mogigiyon kampung.
“Nga’ diti baino’ poinsuai tokuuri’ hinombo do pinapaanjur yahai ababayan momuhu rinomos id pososorili’ no do walai diolo’ sabab mantad pinogintongan dahai, ogumu’ kopio rinomos i poinguntun nga’ amu’ pinoduli’ di kogumuan mogigiyon Kampung Tanjung Aru Lama.
“Mantad ababayan diti, kalansanan do kosili ilo’ do iso’ laang pongimpuun mooi do mogigiyon kampung do hiti lobi kopoduli montok momurisi’ kinoiyonon pongingiyonon diolo’ sondiri,” ka disio id kointalangan media do hiti di baino’.
MOBI’ mogigiyon Kampung Tanjung Aru Lama masaan monguhup popoikid bakul takanon montok mogigiyon kampung i nakaampai doid ababayan kinopomuhuan rinomos soira’ nopongo ababayan.
Naamot dilo’, minoboros nogi’ i Ainie do MASESA nga’ pinopoikid nogi’ do bakul takanon i pinotoluod di pipiro bohogian kumaa mogigiyon Kampung Tanjung Aru Lama i minooi ampai id ababayan momuhu rinomos pinaanjur do bohogian disio dilo’.
Minonongkounsikou nogi’ isio kumaa bohogian di nokogompit id kinoponoluodan kobuburuon kapaampai tanaknon montok pinoikid kumaa mogigiyon Kampung Tanjung Aru Lama.
PRESIDEN MASESA, i Ainie Jamin guminambar pinopokito dilo’ 800 kilogram rinomos i nopuhu do sukarelawan MASESA om mogigiyon Kampung Tanjung Aru Lama.
