HAJIJI pinapatahak toluod bakul takanon mantad SEDIA kuminaa dilo songulun mamamaramit kopihondot Ababayan CSR do SEDIA id Longkod Koubasanan Bajau Samah id Kampung Lok Batik, id Tuaran, do hiti konihab.
TUARAN: Bohogian Kikuasa Kopotundaan Ikonomi om Kopoopuan Sabah (SEDIA) pinokianu tumilombus paragat id ababayan tonggungan sosial korporat (CSR) id pogun diti, suai ko’ mamalan om mongulud ababayan kopotundaan id Sabah.
Boyoon Montiri Datuk Seri Hajiji Haji Noor minoboros, pinggisoman do SEDIA pinopoimpuun ababayan CSR montok mongintutun koiyonon i mogigiyon dau noumpadanan kopio do pandemik (tomporuruol) Covid-19 om pinopoikid bakul takanon kumaa diolo’, unsikohon kopio.
“Pinggisoman CSR do SEDIA diti nga’ okito nogi sabaagi monokodung pinggisaman koporintaan Pogun i pinopoikid po nogi’ do ponguhupan (kaampai bakul takanon) montok monginggaan koinggirotan rayat i noumpadanan gagama’ tomporuruol diti, lolobi no id koiyonon di porikatan.
“Maya’ Ababayan Toluod CSR do SEDIA diti tadau baino’, soginumu’ 300 bakul takanon pinoikid kumaa mogigiyon id pipiro kampung doid watas diti,” ka disio do hiti di konihab.
I Hajiji po nogi Ponorikohon SEDIA, pinapatahak nogi do ponguhupan bakul takanon dilo’ kumaa pipiro mogigiyon id ababayan i pinaanjur doid Longkod Koubasanan Bajau Samah id Kampung Lok Batik, do hiti.
Nokotindapou nogi i Montiri Karaja’-Karaja’ Pinotomod, Datuk Mohd Arifin Arif, Monguhup Montiri Kousinan Pogun Jasni Daya om i Luguan Eksekutif SEDIA, Datuk Seri Hashim Paijan.
Wookon tuduan do ababayan diti nopo nga’ montok popoikid ponguhupan kapaampai bakul takanon kumaa suang walai i nointutunan om kopokito koponokodungan di pinggisoman id pialatan do SEDIA, Koporintaan Pogun, om kukumaraja’ nuludan sogulu id kopotontuan koumoligan rayat mantad tomporuruol Covid-19, suai ko’ monguhup popointutunan koporojistoran ponobokan vaksin Covid-19.
Minoboros i Hajiji, kinopogkorolihan tomporuruol Covid-19 id Malaysia kaampai no id Sabah nokopogowit kinoinsawaton tintob aiso’ karaja’, kopoindalanan pongindopuan noinraatan om kapapanaho’ do rayat nga’ nohimpagangan id pinggisoman manalob kopogkorolihan virus dilo’.
“Kalansanan ku mantad kinopoindalanan ababayan CSR diti kaanu monginggirot piromutan om pisokodungan id pialatan do mogigiyon id watas di nokogompit, Koporintaan Pogun om SEDIA do timpu obontol,” ka disio.
Naamot dilo’, SEDIA nga’ papatantu’ nogi’ do tikid pinggisaman montok popoikid bakul takanon kapananud do kooturan kopoindalanan pinatantau’ (SOP) kaawagu i pinatatap do koporintaan.
SEDIA i tinuridong di ko 15tw Koiso’ 2009, maya’ kinoposuangan Enakmen Bohogian Kikuasa Kopotundaan Ikonomi om Kopoopuan Sabah 2009, nonuan kuasa i kiguno montok tonggungan sabaagi Bohogian Kikuasa Iso’ Koundorongan (One-Stop Authority) montok mamalan, mongulud, popointutun om popoinsikap kopotundaan Koridor Kopotundaan Sabah (SDC).
