Hajiji Haji Noor
KOTA KINABALU: Koporintaan mamaso monoibau kobolingkahangan piromutan digital id Sabah miampai monginsonong lobi 2,000 ‘menara telekomunikasi’ om monuridong 400 i wagu id sahau Palan Piromutan Digital Negara (Jendela), ka di Boyoon Montiri Datuk Seri Hajiji Haji Noor.
Minoboros doid Ababayan kapamaramaian Tadau Mongingia’ Nayatan Pogun Sabah di baino’, minoboros isio do tomporuruol Covid-19 nokoposili dilo’ do lobi kawagat montok tongo’ mongiingia’ do popoindalan karaja’ diolo’ i babaino’ diti okon nodii ko’ kisapad doid pisuk balajaran nopo.
“Tomporuruol nokoposimban kopoindalanan om karaaralano’ koponudukan miampai do otimpas,” ka disio, i minoboros nogi’ do koponudukan om kopinsingilaan noondo diti amu’ nodii aanu powonsoiyon do sopitoguang miagal di laid, suai ko’ poimpahan kopinsingilaan digital nosili karalanon koponudukan tosuul.
Pomogunaan ‘aplikasi’ miagal do Google Classroom om Zoom suai ko’ WhatsApp nogi Telegram montok popoindalan koponudukan id piromutan nopo nga’ karalanon ponudukan doun kaawagu, lolobi no montok koponudukan om pinsingilaan id walai (PdPR) ontok timpu tomporuruol diti.
“Koporintaan karati do kaantaban i potoguang do mongiingia’ id kopoindalanan kelas doid piromutan,” ka disio.
I Boyoon Montiri minoboros komilaan di poinlobi do mongiingia’ montok papatantu’ balajaran aanu poporikot kumaa koinsanai susumikul, lolobi diolo’ i aiso’ piromutan internet nga’ gatangon, sabab no do koyuon ‘topografi’ pogun diti i kapanahak kaantaban id kopotontuan piromutan internet di lobi kosonong.
“Pinoilo oku haro mongingia’ i asansagan mintana’ do bobatu-batu sinodu’ montok papatahak kogogonopan pinsingilaan kumaa susumikul diolo’ naamot sikul nga’ popoindalan mogisusuai karalanon do papatantu’ tangaanak ngaawi’ sikul amu’ oiduanan mantad pinsingilaan diolo’. Montok diti mongunsikou oku,” ka disio.
Minoboros i Hajiji do koporintaan nga’ toririmo nogi do mongunsikou om monokodung pinggisaman mongingkawas karaja’ kopongia’an.
“Pokionuon ku mogigiyon id Sabah montok tumilombus mamantang mongingia’ sabab id timpu ‘siber’ diti sasaru’ tokou koronogu do ogumu’ totondos di aiso’ padaahan kohondot karaja’ kopongia’an. Sundung pi do otopot nopo, osusa’ yati’ do mambayar kawagu tinonggungan om i pinowonsoi do tongo’ mongingia’,” ka disio.
Minanahak i Hajiji do jominan, do koporintaan pogun tumilombus miontong do koburuon balajaran id Sabah miampai osorisid maya’ tongo’ kotinanan di poinggompit om monokodung toinsanan pinggisamanan di napalan montok mongingkawas naangayan akademik id pogun diti.
Kopihondot kapamaramaian Tadau Mongingia’ i pohoroon maya’ piromutan, Tadau Mongingia’ Sabah 2021 nga’ manahak nogi do kopongunsikohan kumaa mongingia’ mantad naangayan di nosigampot.
Gaa’ Kopomuruanan Balajaran (Anugerah Kepimpinan Pendidikan) toun diti pinatahak kumaa di bagas Potunud Balajaran Pogun, Datuk Hajah Maimunah Suhaibul, naamot gaa’ Tokoh Guru pinatahak kumaa di Dr Shirley Tay Siew Hong.
